തളിപ്പറമ്പ് : പന്നിയൂര്‍ വില്ലേജ് ഓഫിസ് ജീവനക്കാരന്‍ കൈക്കൂലി വാങ്ങിയെന്ന പരാതിയില്‍ തളിപ്പറമ്പ് തഹസില്‍ദാര്‍ അന്വേഷണ റിപ്പോര്‍ട്ട് സമര്‍പ്പിച്ചു. കണ്ണൂര്‍ കളക്ടര്‍ക്കാണ് ഇന്നലെ റിപ്പോര്‍ട്ട്് സമര്‍പ്പിച്ചത്. പന്നിയൂര്‍ വില്ലേജിലെ കൂനത്ത് താമസിക്കുന്ന കെ.വി.സഫിയയുടെ പരാതിയിലാണ് നടപടി. സഫിയയുടെ ഭര്‍ത്താവിന് മിച്ചഭൂമിയില്‍ നിന്നും അനുവദിച്ചു കിട്ടിയ സ്ഥലം അളന്നു നല്‍കുന്നതിന് പലതവണയായി വലിയ തുക ജീവനക്കാരന്‍ കൈപ്പറ്റിയതായി സഫിയ പരാതിയില്‍ പറയുന്നു. 4000 രൂപയാണ് അവസാനമായി നല്‍കിയത്. തഹസില്‍ദാര്‍ നിയോഗിച്ച സംഘം സഫിയയില്‍ നിന്നും മൊഴിയെടുത്തിരുന്നു. പരാതിയില്‍ ഉറച്ചു നില്‍ക്കുന്നതായി സഫിയ അന്വേഷണ സംഘത്തോട് പറഞ്ഞിരുന്നു. അന്വേഷണ സംഘം നല്‍കിയ റിപ്പോര്‍ട്ടിന്റെയും സഫിയയില്‍ ശേഖരിച്ച വിവരത്തിന്റെയും അടിസ്ഥാനത്തിലാണ് തഹസില്‍ദാര്‍ കളക്ടര്‍ക്ക് റിപ്പോര്‍ട്ട് നല്‍കിയിരിക്കുന്നത്. ആരോപണ വിധേയനായ ജീവനക്കാരനെ കുറിച്ച് നേരത്തെ തന്നെ ഇത്തരത്തിലുളള ആരോപണങ്ങള്‍ ഉണ്ടായിരുന്നു.