തൊടുപുഴ: ഹോംസ്‌റ്റേയില്‍ അനധികൃതമായി സൂക്ഷിച്ചിരുന്ന വൈന്‍ എക്‌സൈസ് സംഘം പിടികൂടി. അടിമാലിക്ക് സമീപം കല്ലാറിലെ ഹോം സ്‌റ്റേയില്‍നിന്ന് ഇന്നലെ രാവിലെ 11 ഓടെയാണ് 2,500 ലിറ്ററോളം വരുന്ന വൈന്‍ പിടികൂടിയത്. രഹസ്യ വിവരത്തിന്റെ അടിസ്ഥാനത്തില്‍ അടിമാലി നാര്‍ക്കോട്ടിക് ഇന്‍സ്‌പെക്ടര്‍മാരായ എം.എസ് ജനീഷിന്റെയും എന്‍ .പി സുധീഷ്‌കുമാറിന്റെയും നേതൃത്വത്തില്‍ നടത്തിയ പരിശോധനയിലാണ് മദ്യം കസ്റ്റഡിയിലെടുത്തത്. കല്ലാര്‍ സ്വദേശിയുടെ സ്ഥാപനം തൃശൂര്‍ക്കാരനായ റഫീക് എന്നയാളാണ് വാടകയ്‌ക്കെടുത്ത് നടത്തുന്നത്. എക്‌സൈസ് സംഘം എത്തുന്നതറിഞ്ഞ് റഫീക് സ്ഥലംവിട്ടു. അനധികൃതമായി വൈന്‍ സൂക്ഷിച്ചതിന് കേസ് രജിസ്റ്റര്‍ ചെയ്തതായി എക്‌സൈസ് അധികൃതര്‍ അറിയിച്ചു
ടൂറിസ്റ്റ് കേന്ദ്രമായ മൂന്നാറിലും പരിസരങ്ങളിലും വില്‍പന നടത്തുകയായിരുന്നു ലക്ഷ്യമെന്ന് കരുതുന്നു. ബിവറേജ് ഔട്ട്‌ലെറ്റുകളിലെയും ബാര്‍ ഹോട്ടലുകളിലെയും മദ്യവില്‍പനയ്ക്ക് കോടതി വിധിയോടെ നിയന്ത്രണം വന്ന സാഹചര്യത്തിലാണ് വൈന്‍ വ്യാപാരം വ്യാപകമാകുതെന്ന് സംശയിക്കുന്നതായി എക്‌സൈസ് അധികൃതര്‍ പറഞ്ഞു.