തിരുവനന്തപുരം: സംസ്ഥാനത്തെ 45 സര്‍ക്കാര്‍ പോളിടെക്‌നിക് കോളജുകള്‍, 6 എയ്ഡഡ് പോളിടെക്‌നിക്, 16 സ്വാശ്രയ പോളിടെക്‌നിക്കുകളിലെ സര്‍ക്കാര്‍ സീറ്റുകള്‍ എന്നിവയിലേക്കുള്ള 2017-18 വര്‍ഷത്തെ അപേക്ഷ ഇന്നു കൂടി ഓണ്‍ലൈനായി സമര്‍പ്പിക്കാം. പത്താം ക്ലാസ് വിജയമാണ് യോഗ്യത. ഒരു വിദ്യാര്‍ഥിക്ക് സംസ്ഥാനാടിസ്ഥാനത്തില്‍ 30 ചോയ്‌സുകള്‍ വരെ നല്‍കാം. ഓണ്‍ലൈനായി സമര്‍പ്പിച്ച അപേക്ഷകള്‍ പ്രിന്റ് എടുത്ത് സംസ്ഥാനത്തെ ഏതെങ്കിലും പോളിടെക്‌നിക് കോളജില്‍ ഫീസ് അടച്ച് രജിസ്റ്റര്‍ ചെയ്യണം. ജനറല്‍ വിഭാഗത്തിന് 150 രൂപയും എസ്.സി, എസ്.ടി വിഭാഗത്തിന് 75 രൂപയുമാണ് ഫീസ്. പോളിടെക്‌നിക്കുകളില്‍ വിദ്യാര്‍ഥി സമര്‍പ്പിക്കുന്ന അപേക്ഷ ഹെല്‍പ്പ് ഡെസ്‌ക്കുകളില്‍ പ്രവര്‍ത്തിക്കുന്ന അധ്യാപകര്‍ സൂക്ഷ്മപരിശോധന നടത്തി തെറ്റുകള്‍ തിരുത്തി വീണ്ടും പ്രിന്റ് എടുത്ത് നല്‍കും. അതില്‍ വിദ്യാര്‍ഥിയും, രക്ഷിതാവും സൂക്ഷ്മ പരിശോധന നടത്തിയ അധ്യാപകനും ഒപ്പിടണം. തുടര്‍ന്ന് ഫീസ് അടച്ച് രജിസ്റ്റര്‍ ചെയ്യാം. രജിസ്‌ട്രേഷന്‍ നമ്പര്‍ അടങ്ങിയ സ്ലിപ്പ് വിദ്യാര്‍ഥിക്ക് നല്‍കും. പോളിടെക്‌നിക്കുകളില്‍ 31 വരെ രജിസ്റ്റര്‍ ചെയ്യാം.