സതാംപ്ടന്‍: ദക്ഷിണാഫ്രിക്കക്കെതിരായ രണ്ടാം ഏകദിനത്തില്‍ നാടകീയ വിജയം സ്വന്തമാക്കി ഇംഗ്ലണ്ട് മൂന്ന് മത്സരങ്ങളടങ്ങിയ പരമ്പര 2-0ത്തിന് നേടി. ആദ്യം ബാറ്റ് ചെയ്ത ഇംഗ്ലണ്ട് ആറ് വിക്കറ്റ് നഷ്ടത്തില്‍ 330 റണ്‍സെടുത്തപ്പോള്‍ ദക്ഷിണാഫ്രിക്കയ്ക്ക് അഞ്ച് വിക്കറ്റ് നഷ്ടത്തില്‍ 328 റണ്‍സെടുക്കാനെ കഴിഞ്ഞുള്ളു. അവസാന ഓവറില്‍ ഏഴ് റണ്‍സ് മാത്രമായിരുന്നു ദക്ഷിണാഫ്രിക്കയ്ക്ക് ജയിക്കാന്‍ വേണ്ടിയിരുന്നത്. എന്നാല്‍ ഇംഗ്ലീഷ് ബൗളര്‍ മാര്‍ക്ക് വുഡിന്റെ അവസാന ഓവറില്‍ നാല് റണ്‍സ് മാത്രമാണ് അവര്‍ക്ക് നേടാനായത്. ക്വിന്റന്‍ ഡി കോക്ക് (98), ഡിവില്ല്യേഴ്‌സ് (52), മില്ലര്‍ (71) എന്നിവര്‍ ദക്ഷിണാഫ്രിക്കക്കായി തിളങ്ങി. നേരത്തെ ബെന്‍ സ്റ്റോക്‌സ് 79 പന്തില്‍ 11 ഫോറും മൂന്ന് സിക്‌സും സഹിതം നേടിയ 101 റണ്‍സാണ് ഇംഗ്ലണ്ടിന് കൂറ്റന്‍ സ്‌കോര്‍ സമ്മാനിച്ചത്.