ബംഗളൂരു: ദക്ഷിണേന്ത്യയിലെ വിമാനയാത്രക്കാരില്‍ ഏറ്റവും കൂടുതല്‍പേര്‍ യാത്ര ചെയ്തതിന്റെ ക്രെഡിറ്റ് കര്‍ണാടകക്ക്. ദേശീയ തലത്തില്‍ കര്‍ണാടക മൂന്നാം സ്ഥാനത്തെത്തി. കേന്ദ്ര വ്യോമയാന മന്ത്രാലയത്തിന്റെ പുതിയ കണക്കിലാണ് കര്‍ണാടക ദക്ഷിണേന്ത്യയില്‍ ഒന്നാമതെത്തിയത്. അഞ്ച് ദക്ഷിണേന്ത്യന്‍ സംസ്ഥാനങ്ങളും രണ്ട് കേന്ദ്ര ഭരണ പ്രദേശങ്ങളിലും കര്‍ണാടക ഒന്നാം സ്ഥാനത്തെത്തിയതായി ഇന്നലെ വ്യോമയാന മന്ത്രാലയം പുറത്തുവിട്ട റിപ്പോര്‍ട്ടില്‍ വ്യക്തമാക്കുന്നു.
2016-17 വര്‍ഷത്തില്‍ 247.4 ലക്ഷം പേരാണ് കര്‍ണാടകയില്‍ നിന്ന് വിദേശങ്ങളിലേക്കും തിരിച്ചും വിമാന യാത്രചെയ്തത്. 2014-15 വര്‍ഷത്തിലേതിനേക്കാള്‍ 21.2 ശതമാനം വര്‍ധനവാണ് രേഖപ്പെടുത്തിയത്. ഏറ്റവും കൂടുതല്‍ വിമാനയാത്രക്കാര്‍ ഡല്‍ഹിയിലും രണ്ടാം സ്ഥാനത്ത് മഹാരാഷ്ട്രയുമാണ്. ഡല്‍ഹിയില്‍ 577 ലക്ഷം യാത്രക്കാരുണ്ടായപ്പോള്‍ മഹാരാഷ്ട്രയില്‍ 543.2 ലക്ഷം യാത്രക്കാരാണുണ്ടായത്.
ദക്ഷിണേന്ത്യയില്‍ കര്‍ണാടകക്കു പിന്നാലെ 229.1 ലക്ഷം യാത്രക്കാരുമായി തമിഴ്‌നാടും 154.9 ലക്ഷം യാത്രക്കാരുമായി കേരളവും രണ്ടും മൂന്നും സ്ഥാനങ്ങളിലെത്തി. തെലങ്കാനയില്‍ 151 ലക്ഷവും ആന്ധ്രയില്‍ 37.3 ലക്ഷവും വിമാന യാത്രക്കാരാണ് ഉള്ളത്.