ഗൂഡല്ലൂര്‍: ഗൂഡല്ലൂരിലെ വിവിധ പ്രദേശങ്ങളില്‍ ഒറ്റയാനകള്‍ നടത്തിയ ആക്രമണത്തില്‍ മൂന്ന് വീടുകളും ഒരു കടയും തകര്‍ന്നു. ദേവാല ടാന്‍ടീയിലും തുറപ്പള്ളിയിലുമാണ് ഒറ്റയാന്റെ ആക്രമണുണ്ടായത്. ദേവാലയില്‍ മൂന്ന് വീടുകളും തുറപ്പള്ളിയില്‍ ഒരു കടയുമാണ് ആനകള്‍ തകര്‍ത്തത്. ദേവാല ടാന്‍ടി മൂന്നാം ഡിവിഷനിലെ മുരുകേശന്‍, വടിവേലു, നാഥന്‍ എന്നിവരുടെ വീടുകളാണ് ആനയുടെ ആക്രമണത്തില്‍ തകര്‍ന്നത്.
ഇന്നലെ പുലര്‍ച്ചെ രണ്ടിനാണ് സംഭവം. സംഭവസമയത്ത് വീട്ടിലുണ്ടായിരുന്ന കുടുംബങ്ങള്‍ അയല്‍ വീടുകളില്‍ അഭയം തേടിയതിനാലാണ് മറ്റ് അനിഷ്ട സംഭവങ്ങള്‍ ഒഴിവായത്.
മുരുകേശനും കുടുംബവുമാണ് വീട്ടിനുള്ളിലുണ്ടായിരുന്നത്. ശബ്ദംകേട്ടുണര്‍ന്ന ഇവര്‍ അയല്‍വീട്ടില്‍ അഭയം പ്രാപിക്കുകയായിരുന്നു.
തുറപ്പള്ളിയിലെ സുലൈമാന്റെ പച്ചക്കറിക്കടയാണ് മറ്റൊരൊറ്റയാന്‍ കഴിഞ്ഞ ദിവസം തന്നെ രാത്രിയില്‍ തകര്‍ത്തത്. പച്ചക്കറികളെല്ലാം നശിപ്പിക്കപ്പെട്ടിട്ടുണ്ട്. ഇതുമായി ബന്ധപ്പെട്ട് ഇയാള്‍ വനംവകുപ്പിന് പരാതി നല്‍കി.
ഗൂഡല്ലൂര്‍ മേഖലയില്‍ ശമനമില്ലാതെ തുടരുകയാണ് കാട്ടാനകളുടെ ശല്ല്യം. ജനവാസ കേന്ദ്രങ്ങളിലിറങ്ങുന്ന ആനകള്‍ മനുഷ്യ ജീവനടക്കം നാശം വിതക്കുകയാണ്.
ഇതിന് പുറമെ കൃഷി, വാഹനം, വീട് എന്നിവയും ആനകളുടെ ആക്രമണങ്ങളില്‍ നശിപ്പിക്കപ്പെടുന്നുണ്ട്. എന്നാല്‍ ആനശല്ല്യത്തിന് ശാശ്വതമായി ഒരു പരിഹാരം കാണാന്‍ അധികൃതര്‍ക്ക് ഇതുവരെ സാധിച്ചിട്ടില്ല.
ഇത് ജനങ്ങള്‍ക്കിടയില്‍ കടുത്ത പ്രതിഷേധത്തിന് ഇടയാക്കിയിട്ടുണ്ട്. ഗൂഡല്ലൂര്‍ നഗരസഭാ പരിധിയില്‍പോലും ആനശല്ല്യം അതിരൂക്ഷമാണ്. തുറപ്പള്ളിയില്‍ ആനകളിറങ്ങാത്ത ദിവസങ്ങളില്ലെന്ന് വേണം പറയാന്‍. സമീപത്ത് വനമായതിനാല്‍ പകല്‍ സമയങ്ങളില്‍ പോലും ആനകള്‍ ജനവാസ കേന്ദ്രങ്ങളിലിറങ്ങുന്നത് പതിവാണ്. ഇതുകൊണ്ട് രക്ഷിതാക്കള്‍ കുട്ടികളെ വിദ്യാലയങ്ങളിലേക്ക് അയക്കുന്നത് ഭീതിയോടെയാണ്. ആനപ്പേടി കാരണം സന്ധ്യയായാല്‍ ജനങ്ങള്‍ പുറത്തിറങ്ങാന്‍ ഭയക്കുകയാണ്.