കാസര്‍കോട്: സാമൂഹ്യവനവല്‍ക്കരണ പരിപാടിയുടെ ഭാഗമായി കള്ളാര്‍-കുറ്റിക്കോല്‍ ഗ്രാമപഞ്ചായത്തുകളിലായി നബാര്‍ഡിന്റെ സഹായത്തോടെ ആര്‍.ഐ.ഡി.എഫ് പദ്ധതിയില്‍ ഉള്‍പ്പെടുത്തി നടപ്പാക്കി വരുന്ന കാപ്പുംകര നീര്‍ത്തട പദ്ധതി പ്രദേശത്ത് 350 ഫലവൃക്ഷത്തൈ വിതരണം ചെയ്തു.
കുടുംബൂര്‍ ഗവ. ട്രൈബല്‍ വെല്‍ഫെയര്‍ എല്‍.പി സ്‌കൂളില്‍ നടന്ന ചടങ്ങില്‍ കള്ളാര്‍ ഗ്രാമപഞ്ചായത്ത് വൈസ് പ്രസിഡന്റ് ടി.കെ നാരായണന്‍ വിതരണോദ്ഘാടനം നിര്‍വഹിച്ചു.
കുറ്റിക്കോല്‍ ഗ്രാമപഞ്ചായത്ത് അംഗം ജോസഫ് പാറത്തട്ടേല്‍ അധ്യക്ഷനായി. ജില്ലാ മണ്ണ് സംരക്ഷണ ഓഫിസര്‍ വി.എം അശോക് കുമാര്‍, ഓവര്‍സിയര്‍ ബാലകൃഷ്ണ ആചാര്യ, നീര്‍ത്തട കമ്മിറ്റി കണ്‍വീനര്‍ കെ. കൃഷ്ണന്‍ എന്നിവര്‍ സംസാരിച്ചു.