കരുവാരകുണ്ട്: മേഖലയില്‍ മഴയോടൊപ്പം ആഞ്ഞടിച്ച കാറ്റില്‍ വ്യാപക നാശനഷ്ടം. കക്കറയില്‍ 20 വീടുകള്‍ പൂര്‍ണമായും, 30 ലധികം വീടുകള്‍ ഭാഗികമായും തകര്‍ന്നു. പലയിടത്തും ഗതാഗത തടസവുമുണ്ടായി.
കുണ്ടോട മുതല്‍ കക്കറ വരെയുള്ള ഭാഗങ്ങളില്‍ ഏക്കര്‍ കണക്കിന് ഭൂമിയിലെ കാര്‍ഷിക വിളകള്‍ നശിച്ചു.പാണ്ടിക്കാട് കരുവാരകുണ്ട് റൂട്ടില്‍ മണിക്കൂറുകളോളം ഗതാഗതം തടസപ്പെട്ടു. വീടിനു മീതെ മരം വീണ് ഓടുകള്‍ ദേഹത്ത് വീണ് കക്കറയിലെ പേങ്ങയില്‍ ബിയ്യുമ്മ, പേരമകള്‍ നഷ്‌വ എന്നിവര്‍ക്ക് സാരമായി പരിക്കേറ്റു. ഐ.ടി ജലീലിന്റ മുവായിരത്തില്‍ പരം വാഴകളും കുണ്ടോട നെടുമ്പറമ്പന്‍ ഹംസയുടെ 1500 വാഴയും നശിച്ചു. റവന്യൂ, പഞ്ചായത്ത്, കൃഷി വകുപ്പ് അധികൃതര്‍ സ്ഥലം സന്ദര്‍ശിച്ചു.
മമ്പാട്: മരം കടപുഴകി വീണ് വീട് തകര്‍ന്നു. പൊങ്ങല്ലൂര്‍ പൂച്ചപ്പാറ പുതു മാളിയേക്കല്‍ കദീജയുടെ വീടാണ് തകര്‍ന്നത്. ശബ്ദം കേട്ട് വീട്ടുകാര്‍ ഓടിരക്ഷപ്പെട്ടതിനാല്‍ വന്‍ ദുരന്തമാണ് ഒഴിവായത്. ഒരു ലക്ഷം രൂപയുടെ നഷ്ടം കണക്കാക്കുന്നു