തൃശൂര്‍: എന്റെ വടക്കാഞ്ചേരി സമ്പൂര്‍ണ്ണ ആരോഗ്യ സുരക്ഷിതത്വ മണ്ഡലം എന്ന പദ്ധതിക്ക് ഇന്ന് തുടക്കമാകുമെന്ന് എം.എല്‍.എ അനില്‍ അക്കര വാര്‍ത്താ സമ്മേളനത്തില്‍ അറിയിച്ചു.
വടക്കാഞ്ചേരി നിയോജക മണ്ഡലത്തിലെ മുഴുവന്‍ കുടുംബങ്ങളേയും കേന്ദ്ര പൊതുമേഖല ഇന്‍ഷൂറന്‍സ് കമ്പനികളുടെ സഹായത്തോടെയാണ് പദ്ധതി നടപ്പിലാക്കുക.
ഈ പദ്ധതിവഴി ഒരു കുടുംബത്തിലെ 5 അംഗങ്ങള്‍ക്ക് അമ്പതിനായിരം രൂപയുടെ ഇന്‍ഷൂറന്‍സ് കവറേജ് ഇന്ത്യയിലെ എല്ലാ ആശുപത്രികളിലും കിടത്തി ചികിത്സ എന്നിവ സൗജന്യമായി ലഭിക്കുമെന്നും എം.എല്‍.എ പറഞ്ഞു. മൂന്നുമാസം പ്രായമുള്ള കുട്ടി മുതല്‍ 65 വയസ്സുവരെയുള്ള വ്യക്തികള്‍ക്ക് പദ്ധതിയില്‍ അംഗമാകാം. അംഗമായി ചേരുന്ന കുടുംബനാഥന്‍ 810 രൂപയാണ് ഫീസ്. ഭാര്യക്ക് 200 രൂപയും വിവാഹം കഴിയാത്ത ഓരോ മക്കള്‍ക്കും 150 രൂപയും പ്രത്യേകം അടയ്ക്കണം.
25 വയസ്സു കഴിഞ്ഞ ആണ്‍കുട്ടികള്‍ക്ക് 810 രൂപ അടച്ച് പ്രത്യേകം മെമ്പര്‍ഷിപ്പ് എടുക്കണം. ഇതിന് പുറമെ ആകെ സംഖ്യയുടെ 18 ശതമാനത്തോളം ടാക്‌സ് നല്‍കണമെന്നും അവര്‍ പറഞ്ഞു. ഈ പദ്ധതിയില്‍ അംഗത്വമെടുക്കുന്നതിനുള്ള അപേക്ഷാ ഫോമുകള്‍ അതത് പ്രദേശത്തെ വാളണ്ടിയര്‍മാര്‍ വഴിയും അമല ആശുപത്രിയിലെ ഹെല്‍പ്പ് ഡെസ്‌ക്ക് വഴിയും എം.എല്‍.എ ഓഫീസ് വഴിയും ലഭ്യമാകും. വാര്‍ത്താ സമ്മേളനത്തില്‍ രാജേന്ദ്രന്‍ അരങ്ങത്ത്, കെ.അജിത്കുമാര്‍, ജിമ്മി ചൂണ്ടല്‍, എന്‍.എ സാബു എന്നിവരും പങ്കെടുത്തു.