ന്യൂഡല്‍ഹി: ആശ വര്‍ക്കര്‍മാരുടെ വേതനം വര്‍ധിപ്പിക്കുമെന്ന് കേന്ദ്ര ആരോഗ്യ മന്ത്രി ജെ.പി നദ്ദ രാജ്യസഭയില്‍. സന്തോഷ് കുമാര്‍ എം.പിയുടെ ചോദ്യത്തിന് നല്‍കിയ മറുപടിയിലാണ് അദ്ദേഹം ഇക്കാര്യം വ്യക്തമാക്കിയത്. 

ആശ വര്‍ക്കര്‍മാര്‍ക്ക് സാമ്പത്തിക സഹായം നല്‍കുന്ന വിഷയം ചര്‍ച്ച ചെയ്യാനായി ദേശീയ ആരോഗ്യ മിഷന്റെ യോഗം കഴിഞ്ഞയാഴ്ച ചേര്‍ന്നിരുന്നു. ഇതിന്റെ അടിസ്ഥാനത്തിലാണ് തീരുമാനം. ആശ വര്‍ക്കര്‍മാരുടെ കഠിനാധ്വാനത്തെയും ഗ്രാമീണ മേഖലയില്‍ ചെയ്യുന്ന കടമകളെയും അഭിനന്ദിക്കുന്നുവെന്ന് പറഞ്ഞ മന്ത്രി ആശ വര്‍ക്കര്‍മാരുടെ വേതനം വര്‍ധിപ്പിക്കുമെന്നും വ്യക്തമാക്കി. 

അതേസമയം, ദേശീയ ആരോഗ്യ മിഷനില്‍ നിന്നും ആശ വര്‍ക്കര്‍മാര്‍ക്കുള്ള കേന്ദ്രവിഹിതം നല്‍കിയില്ലെന്ന കേരളത്തിന്റെ ആരോപണം നദ്ദ നിഷേധിച്ചു.  ആക്ഷേപം ശരിയല്ലെന്ന് പറഞ്ഞ മന്ത്രി കേരളത്തിന് വിഹിതം കൃത്യമായി നല്‍കിയിട്ടുണ്ടെന്നും വ്യക്തമാക്കി.

കേരളത്തിന് കുടിശ്ശിക തുകയായി ഒന്നും നല്‍കാനില്ലെന്നും മന്ത്രി കൂട്ടിച്ചേര്‍ത്തു. എന്നാല്‍ മുഴുവന്‍ തുക നല്‍കിയിട്ടും അതിന്റെ വിനിയോഗത്തിന്റെ വിശദാംശങ്ങള്‍ കേരളം നല്‍കിയിട്ടില്ലെന്നും ജെ.പി. നദ്ദ ചൂണ്ടിക്കാട്ടി.

വിവിധ ആവശ്യങ്ങളുന്നയിച്ച് സെക്രട്ടേറിയറ്റ് നടയില്‍ കേരള ആശാ ഹെല്‍ത്ത് വര്‍ക്കേഴ്‌സ് അസോസിയേഷന്റെ നേതൃത്വത്തില്‍ നടത്തുന്ന സമരം ഒരു മാസം പിന്നിട്ടിരിക്കുകയാണ്. ഒരു മാസമായിട്ടും സര്‍ക്കാര്‍ ഇടപെടാത്തതില്‍ പ്രതിഷേധിച്ച് സമരം ശക്തമാക്കാനുള്ള നീക്കത്തിലാണ് ആശാ പ്രവര്‍ത്തകര്‍. മാര്‍ച്ച് 17ന് സെക്രട്ടേറിയറ്റ് ഉപരോധിക്കും. വിവിധ സംഘടനകളുടെ പിന്തുണയോടെയാവും ഉപരോധം.