തൃക്കരിപ്പൂര്‍: ബാങ്കില്‍ ജോലി സ്ഥിരപ്പെടുത്താത്തതിലും കോടതി വിധി നടപ്പാക്കത്തതിലും പ്രതിഷേധിച്ച് പട്ടികജാതിക്കാരായ അമ്മയും മകനും ബാങ്കിന് മുന്നില്‍ നിരാഹാര സമരം തുടങ്ങി.
കഴിഞ്ഞ പതിനാറ് വര്‍ഷമായി ദിവസ വേതനത്തില്‍ ജോലിചെയ്തിട്ടും സ്ഥിരനിയമനം നല്‍കുന്നില്ലെന്ന് ആരോപിച്ച് കണ്ണൂര്‍ ചെറുപുഴ പ്രാപ്പൊയില്‍ സ്വദേശിയും ഇന്ത്യന്‍ ഓവര്‍സീസ് ബാങ്ക് ദിവസ വേതന ജിവനക്കാരനുമായ കവിണിശ്ശേരി മനോജും മാതാവ് അമ്മിണിയുമാണ് ഇന്ത്യന്‍ ഓവര്‍സീസ് ബാങ്ക് തൃക്കരിപ്പൂര്‍ ശാഖക്ക് മുന്നില്‍ ഇന്നലെ മുതല്‍ നിരാഹാര സമരം തുടങ്ങിയത്.
ഒരു വര്‍ഷം താല്‍കാലികമായി ജോലി ചെയ്താല്‍ സ്ഥിര നിയമനം നല്‍കാമെന്നിരിക്കെ, പതിനാറ് വര്‍ഷം ജോലി ചെയ്തിട്ടും ബാങ്ക് കബളിപ്പിക്കുകയായിരുന്നുവെന്നും മനോജ് കുറ്റപ്പെടുത്തി. തനിക്ക് അനുകൂലമായ നടപടിക്ക് ഹൈക്കോടതി ഉത്തരവ് പുറപ്പെടുവിച്ചിട്ടും ഒരു ദിവസം പോലും ജോലി ചെയ്യാത്തവരെ സ്ഥിരപ്പെടുത്തുകയും ചെയ്തു. കോടതി ഉത്തരവ് പാലിക്കാത്ത ബാങ്കിനെതിരേ കോടതിയലക്ഷ്യ നടപടിയുമായി മുന്നോട്ടുപോകുമെന്ന് മനോജ് അറിയിച്ചു.