തരുവണ: വെള്ളമുണ്ടയിലെ കര്‍മ്മസമിതിക്കും നാട്ടുകാര്‍ക്കും പൊതുമരാമത്ത് വകുപ്പുദ്യോഗസ്ഥരും കരാറുകാരനും കൊടുത്ത വാക്കുപാലിച്ചു. തരുവണ-വെള്ളമുണ്ട-നിരവില്‍പ്പുഴ റോഡിന്റെ നിര്‍മാണ ജോലികള്‍ ആരംഭിച്ചു.
സമരത്തിനൊരുങ്ങിയ നാട്ടുകാരോട് മെറ്റല്‍ നിരത്തുന്ന ജോലികള്‍ തിങ്കളാഴ്ച തുടങ്ങുമെന്ന് പൊതുമരാമത്ത് വകുപ്പ് അധികൃതര്‍ കല്‍പ്പറ്റ ഓഫിസില്‍ നടത്തിയ ചര്‍ച്ചയില്‍ ഉറപ്പ് നല്‍കിയിരുന്നു. കാലാവസ്ഥ മോശമല്ലെങ്കില്‍ മെക്കാഡം ജോലികളും ചെയ്യുമെന്ന് കരാറുകാരന്‍ പറഞ്ഞിരുന്നു. കഴിഞ്ഞ ദിവസങ്ങളില്‍ മഴ ആയതിനാല്‍ തിങ്കളാഴ്ചക്ക് പകരം ചൊവ്വാഴ്ചയാണ് മെറ്റല്‍ നിരത്തുന്ന ജോലി തുടങ്ങിയത്. കുഴികളിലെ വെള്ളം വറ്റിച്ചാണ് പ്രവൃത്തി തുടങ്ങിയത്. രാത്രി മഴ ആയിരുന്നതിനാല്‍ രാവിലെ ജോലി തുടങ്ങാനായില്ല. ഉച്ചയോടെ മെറ്റല്‍ നിരത്തി തുടങ്ങി. തരുവണ മുതല്‍ വെള്ളമുണ്ട വരെയാണ് ആദ്യഘട്ടം. രണ്ടാംഘട്ടം മഴ കുറഞ്ഞാല്‍ ഈമാസം 20ന് തുടങ്ങും. ഇതിനിടെ റോഡരികിലെ ഇലക്ട്രിക് പോസ്റ്റുകള്‍ മാറ്റുന്നതിന് കെ.എസ്.ഇ.ബിക്ക് കരാറുകാരന്‍ നല്‍കിയ ചെക്ക് അക്കൗണ്ടില്‍ പണമില്ലാത്തതിനാല്‍ മടങ്ങിയത് വിവാദമായിരുന്നു. കെ.എസ്.ഇ.ബിക്ക് നല്‍കാനുള്ള അഞ്ചര ലക്ഷം രൂപ പണമായി സ്വീകരിക്കാന്‍ കഴിയാത്തതിനാല്‍ പണം കൊണ്ടുചെന്നപ്പോള്‍ കെ.എസ്.ഇ.ബി ഉദ്യോഗസ്ഥര്‍ സ്വീകരിക്കാതിരുന്നതായിരുന്നുവെന്ന് കരാറുകാരന്‍ പറയുന്നു.
പകരം കൊടുത്ത ചെക്ക് കരാറുകാരന്റെ ഒ.ഡി അക്കൗണ്ടിന്റേതായിരുന്നു. ഉദ്യോഗസ്ഥര്‍ രണ്ട് ദിവസം കഴിഞ്ഞ് ചെക്ക് ബാങ്കില്‍ സമര്‍പ്പിച്ചപ്പോഴേക്കും ഒ.ഡിയുടെ പലിശ പിടിച്ചതിനാല്‍ ആവശ്യത്തിന് ബാലന്‍സില്ലാതെ ചെക്ക് മടങ്ങി. പകരം തുക 562,144 രൂപ തിങ്കളാഴ്ച അക്കൗണ്ട് വഴി കെ.എസ്.ഇ.ബിക്ക് കരാറുകാരന്‍ നല്‍കി. ഇതോടെ ഈ ആഴ്ച തന്നെ ഇലക്ട്രിക് പോസ്റ്റുകള്‍ മാറ്റുമെന്നുറപ്പായി. തടസമുള്ള മരങ്ങള്‍ മുറിച്ചു മാറ്റലാണ് മറ്റൊരു ജോലി. വനം വകുപ്പിന്റെ അനുമതി കിട്ടിയതിനാല്‍ മരങ്ങള്‍ ഈ ആഴ്ച ലേലം ചെയ്യുമെന്നാണ് അറിയുന്നത്.