ചേര്‍ത്തല: ബന്ധുവായ യുവതിക്കൊപ്പം കാണാതായ പത്താം ക്ലാസ് വിദ്യാര്‍ഥിയെ ഫോര്‍ട്ട് കൊച്ചിയില്‍നിന്ന് പൊലിസ് പിടികൂടി. കഴിഞ്ഞ ചൊവ്വാഴ്ച മുതല്‍ ചേര്‍ത്തലയില്‍നിന്നു കാണാതായ മായിത്തറ സ്വദേശിയായ പത്താം ക്ലാസ് വിദ്യാര്‍ഥിയെയും കടവന്ത്ര സ്വദേശിനിയായ 28 കാരി യുവതിയെയുമാണു കണ്ടെത്തിയത്.
ഇവര്‍ ഫോര്‍ട്ട് കൊച്ചിക്ക് സമീപത്തെ വീട്ടില്‍ കഴിയുകയായിരുന്നു. ഇന്നലെ രാവിലെ കടപ്പുറത്ത് ചെന്ന ഇവരുടെ പെരുമാറ്റത്തില്‍ സംശയം തോന്നിയ പ്രദേശവാസി പൊലിസിനു രഹസ്യവിവരം നല്‍കുകയായിരുന്നു. തുടര്‍ന്ന് ഫോര്‍ട്ട് കൊച്ചി പൊലിസെത്തി ഇരുവരെയും കസ്റ്റഡിയിലെടുത്തു. യുവതി കാണാതായത് സംബന്ധിച്ച് കടവന്ത്ര പൊലിസ് കേസ് റജിസ്റ്റര്‍ ചെയ്തിരുന്നതിനാല്‍ ആദ്യം ഇവരെ കടവന്ത്ര സ്റ്റേഷനിലും രാത്രിയോടെ മാരാരിക്കുളം പൊലിസിനും കൈമാറി. വിദ്യാര്‍ഥിയെ തട്ടിക്കൊണ്ടുപോയതിനു യുവതിയെ പ്രതിയാക്കി പൊലിസ് കേസെടുത്തു. ഇവരെ ഇന്ന് കോടതിയില്‍ ഹാജരാക്കും.
വിദ്യാര്‍ഥിയെ ചൈല്‍ഡ് വെല്‍ഫെയര്‍ കമ്മിറ്റിക്കുമുന്‍പാകെ ഹാജരാക്കും. കഴിഞ്ഞ ചൊവ്വാഴ്ച ഇവര്‍ ചേര്‍ത്തല റെയില്‍വേ സ്റ്റേഷനില്‍ എത്തുകയും അവിടെനിന്ന് തിരുവനന്തപുരത്തേക്ക് പോവുകയും ചെയ്തു. റെയില്‍വേ സ്റ്റേഷനിലെ സി സി ടി വിയില്‍ നിന്ന് ഇവരുടെ ദൃശ്യങ്ങള്‍ പൊലിസിനു ലഭിച്ചിരുന്നു.
എന്നാല്‍ പിന്നീട് മറ്റൊരു ട്രെയിനില്‍ ഇവര്‍ തിരിച്ച് എറണാകുളത്തേക്കു തിരിച്ചു. മൊബൈല്‍ ടവര്‍ സൂചനകള്‍ പ്രകാരം പൊലിസ് സേലത്തേക്ക് തിരിച്ചെങ്കിലും യുവതി എറണാകുളത്തെ പഠനകേന്ദ്രത്തില്‍ അടുത്ത ദിവസം എത്തിയതായി പൊലിസിന് വിവരം ലഭിച്ചതിനെ തുടര്‍ന്ന് എറണാകുളം കേന്ദ്രീകരിച്ച് നടത്തിയ അന്വേഷണത്തിലാണ് ഇരുവരെയും പിടികൂടാനായത്.