വിദ്യാനഗര്‍: നായന്മാര്‍മൂലയിലെ ഗള്‍ഫുകാരന്‍ അബ്ദുല്‍ റസാഖിന്റെ വീടു കുത്തിത്തുറന്നു സ്വര്‍ണവും പണവും കവര്‍ന്ന കേസില്‍ രണ്ടുപേര്‍ കൂടി പൊലിസ് വലയിലായതായി സൂചന. പാലക്കാട് സ്വദേശി ഷെറിന്‍, കാസര്‍കോട് സ്വദേശി ഷഫീഖ് എന്നിവരാണു പൊലിസിന്റെ വലയിലായത്.
കേസില്‍ കൊയിലാണ്ടി ഇരിങ്ങല്‍ കോട്ടക്കലിലെ കെ.എം ഫിറോസ്, കുറ്റ്യാടി ഊരണം കുഞ്ഞിപ്പറമ്പിലെ അല്‍ത്താഫ് എന്നിവരെ വിദ്യാനഗര്‍ പൊലിസ് നേരത്തെ അറസ്റ്റ് ചെയ്തിരുന്നു. ഈ കേസില്‍ ഉള്‍പ്പെട്ട ചെര്‍ക്കളക്കു സമീപത്തെ ഇജാസ്, കോഴിക്കോട് സ്വദേശി ഷിജു എന്നിവര്‍ മറ്റൊരു കേസില്‍ തിരൂരങ്ങാടി പൊലിസിന്റെ പിടിയിലാണ്. പൊയിനാച്ചി സെന്റ് മേരീസ് ചര്‍ച്ച്, ബെണ്ടിച്ചാലിലെ മുഹമ്മദ് കുഞ്ഞിയുടെ വീട്, ബെണ്ടിച്ചാലിലെ ഡോ. സൈദ് മുഹമ്മദിന്റെ വീട് എന്നിവിടങ്ങളില്‍ നടന്ന കവര്‍ച്ചക്കു പിന്നിലും ഇതേ സംഘമാണെന്ന് അന്വേഷണത്തില്‍ തെളിഞ്ഞിട്ടുണ്ട്.
കാറിലായിരുന്നു സംഘം കവര്‍ച്ചക്കെത്തിയതെന്നും വ്യക്തമായിട്ടുണ്ട്. കാസര്‍കോട്ട് നിന്നു കോഴിക്കോട്ടേക്കു പോകും വഴിയാണ് ആറംഗ സംഘം ആള്‍താമസമില്ലാത്ത വീടുകളില്‍ കവര്‍ച്ച നടത്താന്‍ പദ്ധതിയിട്ടത്. നായന്മാര്‍മൂലയിലെ റസാഖിന്റെ വീട്ടില്‍ നിന്നു കവര്‍ന്ന സ്വര്‍ണാഭരണവും ടാബും പൊലിസ് കണ്ടെത്തിയിട്ടുണ്ട്.