ക്വലാലംപുര്‍: ആദ്യം മ്യാന്‍മറിനെ എറിഞ്ഞൊതുക്കി, പിന്നെ അടിച്ചൊതുക്കി വിജയം കൊയ്ത് മലേഷ്യ ടി20ലോകപ്പിനുള്ള ഏഷ്യന്‍ ക്വാളിഫയറില്‍ വിജയം സ്വന്തമാക്കി.
കഴിഞ്ഞ ദിവസം മലേഷ്യയില്‍ നടന്ന ഐ.സി.സി ലോക ടി20 മത്സരത്തിന്റെ ഏഷ്യന്‍ യോഗ്യതാ മത്സരത്തിലായിരുന്നു അപൂര്‍വമായൊരു മത്സരം നടന്നത്. പലപ്പോഴും കൂടുതല്‍ റണ്‍സൊഴുകുന്ന മത്സരങ്ങളാണ് ശ്രദ്ധയില്‍ പെടാറുള്ളത്. എന്നാല്‍ ഈ മത്സരം തികച്ചും വ്യത്യസ്തമായിരുന്നു. ടോസ് നേടിയ മലേഷ്യ ബൗളിങ് തിരഞ്ഞെടുക്കുകയായിരുന്നു. മ്യാന്‍മറിന്റെ ബാറ്റിങ് നിരയെ പിഴുതെടുത്തുകൊണ്ടായിരുന്നു മലേഷ്യ തുടങ്ങിയത്. ആദ്യത്തെ മൂന്ന് പന്തില്‍ പൂജ്യം റണ്‍സിന് മ്യാന്‍മറിന് രണ്ട് വിക്കറ്റ് നഷ്ടമായി. തുടര്‍ന്ന് ആറ് ബാറ്റ്‌സ്മാന്‍മാര്‍ പൂജ്യന്‍മാരായി മടങ്ങി.

മഴപെയ്തതിനെ തുടര്‍ന്ന് ഓവര്‍ ചുരുക്കിയപ്പോള്‍ 10.1 ഓവറില്‍ എട്ടുവിക്കറ്റ് നഷ്ടത്തില്‍ ഒന്‍പത് റണ്‍സെടുത്ത് മ്യാന്‍മര്‍ ബാറ്റിങ് അവസാനിപ്പിച്ചു. മലേഷ്യന്‍ താരം പവന്‍ദീപ് സിങ്ങാണ് മ്യാന്‍മര്‍ ബാറ്റിങ് നിരയുടെ അടിവേരറുത്തത്. നാല് ഓവറില്‍ മൂന്ന് ഓവര്‍ മെയ്ഡനാക്കുകയും ഒരു റണ്‍സ് വഴങ്ങുകയും ചെയ്ത് അഞ്ചുവിക്കറ്റാണ് പവന്‍ദീപ് സിങ് നേടിയത്. മ്യാന്‍മറിന്റെ ഒന്‍പത് റണ്‍സില്‍ ആറ് റണ്‍സ് സിംഗിള്‍ ഓടി എടുത്തും ബാക്കി മൂന്ന് ബൈയായും ലഭിച്ചു. മറുപടി ബാറ്റിങ്ങിനിറങ്ങിയ മലേഷ്യക്ക് ഡക്ക് വര്‍ത്ത് ലൂയീസ് നിയമപ്രകാരം എട്ട് ഓവറില്‍ ആറു റണ്‍സ് വേണം എന്ന നിലയിലായി. ആദ്യ ഓവറില്‍ തന്നെ മല്യേഷ്യന്‍ ഓപണര്‍ പൂജ്യത്തിന് പുറത്തായി. പിന്നീട് സുബാന്‍ അളഗരത്‌നം സിക്‌സറടിച്ച് മലേഷ്യക്ക് എട്ടു വിക്കറ്റിന്റെ വിജയം സമ്മാനിച്ചു. ഐ. സി. സി ട്വിറ്ററിലൂടെയാണ് അത്ഭുത മത്സരത്തെ കുറിച്ച് അറിയിച്ചത്.