കുന്ദമംഗലം: കുന്ദമംഗലത്തെ കള്ളനോട്ട് കേസിലെ പ്രതിയെ വീട്ടില്‍കൊണ്ടുവന്ന് തെളിവെടുപ്പ് നടത്തി. കള്ളനോട്ടടി കേന്ദ്രത്തില്‍ പൊലിസ് നടത്തിയ റെയ്ഡില്‍ 12.20 ലക്ഷം രൂപയുടെ കള്ളനോട്ടുകളും നോട്ടടിക്കാന്‍ ഉപയോഗിക്കുന്ന ഉപകരണങ്ങളും പിടികൂടിയ കേസിലെ മുഖ്യപ്രതി കുന്ദമംഗലം വരട്ട്യാക്ക് സ്വദേശി ഷമീര്‍(31)വാടകക്ക് താമസിച്ചിരുന്ന പടനിലം കളരിക്കണ്ടിയിലെ ആലുംതോട്ടത്തില്‍വീട്ടിലാണ് ഇന്നലെ ഉച്ചയ്ക്ക് 12ഓടെ തെളിവെടുപ്പിനായി കൊണ്ടുവന്നത്.
കഴിഞ്ഞമാസം 23ന് ആറ്റിങ്ങല്‍ ഗോകുലം മെഡിക്കല്‍ സെന്ററില്‍ കള്ളനോട്ട് കൈമാറുന്നതിനിടയില്‍ കടയ്ക്കാവൂര്‍ സ്വദേശി രാജന്‍ പത്രോസ് പൊലിസ് പിടിയിലായിരുന്നു. ഇയാളില്‍ നിന്നും ലഭിച്ച വിവരങ്ങളുടെ അടിസ്ഥാനത്തില്‍ നടത്തിയ പരിശോധനയിലാണ് ഷമീര്‍ ഉള്‍പ്പടെ അഞ്ചംഗ കള്ളനോട്ട് സംഘം വലയിലായത്. ഇവരില്‍ നിന്നും 21.4 ലക്ഷം രൂപയുടെ വ്യാജ നോട്ടുകളാണ് പിടിച്ചെടുത്തത്.
ആറ്റിങ്ങല്‍ പൊലിസാണ് പ്രതിയെ തെളിവെടുപ്പിനായി കുന്ദമംഗലത്ത് കൊണ്ടുവന്നത്. റിമാഡിലുള്ള മുഴുവന്‍ പ്രതികളെയും കൂടുതല്‍ അന്വേഷണം നടത്തുന്നതിനായി ആറ്റിങ്ങല്‍ പൊലിസ് കസ്റ്റഡിയില്‍ വാങ്ങുകയായിരുന്നു. ആറ്റിങ്ങല്‍ സി.ഐ വി.വി ദിപിന്‍, സി.പി.ഒ മാരായ ജയന്‍, സലീം, ദിലീപ്, പ്രജീഷ് എന്നിവരാണ് പ്രതിയെ തെളിവെടുപ്പിന് കൊണ്ടുവന്നത്.