പയ്യന്നൂര്‍: സ്‌കൂള്‍ കുട്ടികളുള്‍പ്പടെയുള്ള കാല്‍നടയാത്രക്കാര്‍ക്കും ചെറു വാഹനങ്ങള്‍ക്കും ഭീഷണിയായി നമ്പര്‍ പ്ലേറ്റില്ലാത്ത മണല്‍ ലോറികള്‍ നഗരത്തില്‍ വിലസുന്നു. പിലാത്തറയിലും പരിസര പ്രദേശങ്ങളിലുമാണ് ഇത്തരം ലോറികള്‍ കൂടുതലുള്ളത്. ദേശീയപാത ഒഴിവാക്കി ഉള്‍പ്രദേശങ്ങളിലെ ഇടറോഡുകളാണ് ഇത്തരം ലോറികള്‍ ഓടുന്നതെന്നതിനാല്‍ ഇക്കാര്യം ഇതുവരെ പൊലിസിന്റെയോ മറ്റ് അധികൃതരുടെയോ ശ്രദ്ധയില്‍പെട്ടിട്ടില്ല. വിളയാങ്കോട്, കടന്നപ്പള്ളി ഭാഗങ്ങളില്‍ വ്യാപകമായി നടക്കുന്ന അനധികൃത മണലെടുപ്പ് കേന്ദ്രങ്ങളിലെ ലോറികളാണ് കാല്‍നട യാത്രികര്‍ക്കും കുട്ടികള്‍ക്കും ഭീഷണിയായി തലങ്ങുംവിലങ്ങും ഓടുന്നത്.
അതിരാവിലെ ആരംഭിക്കുന്ന ലോറികളുടെ ഓട്ടം സന്ധ്യയാകുമ്പോള്‍ മാത്രമാണ് അവസാനിക്കുന്നത്. അനധികൃത മണ്ണെടുപ്പ് കേന്ദ്രത്തില്‍ അധികൃതര്‍ പരിശോധനക്കെത്തുമ്പോള്‍ ഇത്തരം ലോറികള്‍ എവിടെയെങ്കിലും മാറ്റിയിടുകയാണ് രീതി. ഇക്കാര്യത്തില്‍ അധികൃതര്‍ ശക്തമായ നിലപാട് സ്വീകരിക്കണമെന്നാണ് നാട്ടുകാരുടെ ആവശ്യം.