പോര്‍ട്ട് ഓഫ് സ്‌പെയിന്‍: വെസ്റ്റ് ഇന്‍ഡീസ് എ ടീമിനെതിരായ രണ്ടാം അനൗദ്യോഗിക ചതുര്‍ദിന ടെസ്റ്റ് മത്സരത്തിലും വെന്നിക്കൊടി നാട്ടിയ ഇന്ത്യ എ ടീമിന് പരമ്പര. ഏഴ് വിക്കറ്റിനാണ് ഇന്ത്യ വിന്‍ഡീസ് ടീമിനെ തകര്‍ത്തത്.
വിന്‍ഡീസ് എ ഉയര്‍ത്തിയ 278 റണ്‍സ് വിജയലക്ഷ്യം മത്സരത്തിലെ നാലാം ദിനം മൂന്ന് വിക്കറ്റുകള്‍ മാത്രം നഷ്ടപ്പെടുത്തി ഇന്ത്യ എ മറികടക്കുകയായിരുന്നു. ആദ്യ ഇന്നിങ്‌സിലെ പിഴവില്‍നിന്ന് പാഠമുള്‍ക്കൊണ്ട് രണ്ടാമിന്നിങ്‌സില്‍ മികച്ച രീതിയില്‍ ബാറ്റ്‌ചെയ്ത മുന്‍നിര ബാറ്റ്‌സ്മാന്മാരാണ് ഇന്ത്യയെ അനായാസ ജയത്തിലേക്ക് നയിച്ചത്. സ്‌കോര്‍. വെസ്റ്റ് ഇന്‍ഡീസ് എ 318, 149. ഇന്ത്യ190, മൂന്നിന് 281. ആദ്യ രണ്ട് ഇന്നിങ്‌സുകളിലായി യഥാക്രമം 58, 68 റണ്‍സുകള്‍ നേടി ഇന്ത്യയുടെ നെടുംതൂണായ പ്രിയങ്ക് പഞ്ചലാണ് കളിയിലെ താരം.
മൂന്നിന് 185 റണ്‍സെന്ന നിലയില്‍ നാലാംദിനം ബാറ്റിങ് തുടര്‍ന്ന ഇന്ത്യയെ അഭിമന്യു ഈശ്വരനും(പുറത്താകാതെ 59) അന്മോള്‍പ്രീത് സിങും (പുറത്താകാതെ 51) ചേര്‍ന്നാണ് വിജയതീരത്തെത്തിച്ചത്. മൂന്നാം ദിവസത്തെ കൂട്ടുകെട്ട് ഇവര്‍ ഇന്നലെയും തുടരുകയായിരുന്നു. നേരത്തെ പരമ്പരയിലെ ആദ്യ ടെസ്റ്റിലും ഇന്ത്യ ജയിച്ചിരുന്നു. ഒരു മത്സരം ബാക്കി നില്‍ക്കെയാണ് മൂന്ന് മത്സരങ്ങളടങ്ങിയ ടെസ്റ്റ് പരമ്പര ഇന്ത്യ എ ടീം സ്വന്തമാക്കിയത്.