നിലമ്പൂര്‍: ചാലിയാര്‍ പഞ്ചായത്തില്‍ വയോജനങ്ങള്‍ക്കുള്ള കട്ടില്‍ വിതരണത്തില്‍ ക്രമക്കേട് നടന്നുവെന്നാരോപിച്ച് കോണ്‍ഗ്രസ് അംഗങ്ങള്‍ വി.ഇ.ഒക്കെതിരെ വിജിലന്‍സിന് പരാതി നല്‍കി.
2017-18 വര്‍ഷത്തില്‍ 60 കഴിഞ്ഞ വയോധികര്‍ക്ക് കട്ടില്‍ നല്‍കുന്ന പദ്ധതിയില്‍ 92 പേര്‍ക്കാണ് കട്ടിലുകള്‍ നല്‍കിയത്. ഇത് വി.ഇ.ഒ ഓഡിറ്റിങ് വിഭാഗത്തെ തെറ്റിദ്ധരിപ്പിക്കുകയായിരുന്നുവെന്ന് ഇവര്‍ ആരോപിച്ചു. വിതരണത്തിന് കൊണ്ടുവന്ന രണ്ട് കട്ടിലുകള്‍ പഞ്ചായത്ത് പരിസരത്ത് കിടന്ന് നശിക്കുകയാണ്. ഈ സാഹചര്യത്തില്‍ വി.ഇ.ഒ കെ.ജി മുബീബിന് എതിരെ നടപടി വേണമെന്നാവശ്യപ്പെട്ടാണ് കോണ്‍ഗ്രസ് അംഗങ്ങളായ എം.ടി. ലെസ്‌ന, പൂക്കോടന്‍ നൗഷാദ് ഉള്‍പ്പെടെ ആറ് അംഗങ്ങള്‍ മലപ്പുറം വിജിലന്‍സിന് പരാതി നല്‍കിയത്.
അതേസമയം കോണ്‍ഗ്രസ് അംഗങ്ങളുടെ പരാതി വസ്തുതക്ക് നിരക്കുന്നതല്ലെന്ന് വി.ഇ.ഒ കെ.വി.മുജീബ് പറഞ്ഞു. മഞ്ചേരി സിഡ്‌കോക്കാണ് കട്ടില്‍ വിതരണം ടെന്‍ഡര്‍ നല്‍കിയിരുന്നത്. 94 കട്ടിലുകള്‍ സിഡ്‌കോ നല്‍കി ഇതില്‍ ഒന്ന് സാമ്പിളും ഒന്ന് കേട് വന്നത് മാറ്റി നല്‍കാനുമാണ്.
ഈ കട്ടിലുകളാണ് പഞ്ചായത്ത് ഓഫിസ് പരിസരത്ത് കിടക്കുന്നത്. കോണ്‍ഗ്രസ് അംഗങ്ങളെ വി.ഇ.ഒ അസഭ്യം പറഞ്ഞുവെന്നും നടപടിയെടുക്കണമെന്നും ആവശ്യപ്പെട്ട് നേരത്തേയും വി.ഇ. ഒക്കതിരേ യു.ഡി.എഫ് രംഗത്തുവന്നിരുന്നു.