ഇന്ത്യയും വിന്‍ഡീസും തമ്മിലുള്ള മൂന്നാം ടി20 ഇന്ന്

ഗയാന: ഇന്ത്യയും വെസ്റ്റ് ഇന്‍ഡീസും തമ്മിലുള്ള മൂന്നാം ടി20 മത്സരം ഇന്ന് നടക്കും. ആദ്യ രണ്ട് മത്സരങ്ങളിലും ജയം സ്വന്തമാക്കിയ ഇന്ത്യ പരമ്പര തൂത്തുവാരാനുള്ള ഒരുക്കത്തിലാണ് ഇറങ്ങുന്നത്. ഇന്ന് നടക്കുന്ന മത്സരം വിന്‍ഡീസിലായിരിക്കും നടക്കുക. പരമ്പരയിലെ ആദ്യ രണ്ട് മത്സരങ്ങളും അമേരിക്കയിലായിരുന്നു. ബൗളര്‍മാര്‍ തകര്‍ത്താടിയ ആദ്യ മത്സരത്തില്‍ നാല് വിക്കറ്റിനായിരുന്നു ഇന്ത്യ ജയം സ്വന്താക്കിയത്. പുതുമുഖ താരം നവ്ദീപ് സെയ്‌നിയുടെ മിന്നുന്ന ബൗളിങ്ങിന്റെ കരുത്തില്‍ കരുത്തരായ വിന്‍ഡീസ് നിരയെ ഇന്ത്യ 95 റണ്‍സിനാണ് പിടിച്ചുകെട്ടിയത്. ബാറ്റ്‌സ്മാന്‍മാര്‍ക്ക് കാര്യമായ സംഭാവനയൊന്നും നല്‍കാനായില്ലെങ്കിലും ബൗളിങ്ങിലെ കൃത്യതയായിരുന്നു ആദ്യ മത്സരത്തില്‍ ഇന്ത്യക്ക് വിജയം സമ്മാനിച്ചത്. 25 പന്തില്‍ നിന്ന് 24 റണ്‍സെടുത്ത രോഹിത് ശര്‍മയായിരുന്നു ഇന്ത്യയുടെ ടോപ് സ്‌കോറര്‍. രണ്ടാം ടി20യിലും രോഹിത് തന്നെയാണ് ടോപ് സ്‌കോറര്‍. 51 പന്തില്‍ നിന്ന് 67 റണ്‍സാണ് രോഹിത് സ്വന്തമാക്കിയത്. രണ്ടാം മത്സരത്തില്‍ ഇന്ത്യക്ക് മികച്ച സ്‌കോര്‍ കണ്ടെത്താനായെങ്കിലും മഴ പെയ്തതാണ് ഇന്ത്യന്‍ വിജയത്തില്‍ നിര്‍ണായകമായത്. ഡക്ക് വര്‍ത്ത് ലൂയിസ് നിയമപ്രകാരം 22 റണ്‍സിനായിരുന്നു രണ്ടാം മത്സരത്തില്‍ ഇന്ത്യയുടെ വിജയം. രണ്ടാം മത്സരത്തില്‍ 16 പന്തില്‍ നിന്ന് ശിഖാര്‍ ധവാന്‍ 23 റണ്‍സെടുത്തു. 23 പന്ത് നേരിട്ട കോഹ്‌ലി 28 റണ്‍സും സ്വന്തമാക്കി. രണ്ടാം മത്സരത്തില്‍ യുവ താരം സെയ്‌നിക്ക് വിക്കറ്റൊന്നും നേടാനായില്ല. വാഷിങ് ടണ്‍ സുന്ദര്‍, ഭുവനേശ്വര്‍ കുമാര്‍ എന്നിവര്‍ ഓരോ വിക്കറ്റ് വീതവും ക്രുണാല്‍ പാണ്ഡ്യ രണ്ട് വിക്കറ്റും വീഴ്ത്തി. പരമ്പര സ്വന്തമാക്കിയത് കാരണം ഇന്ന് ഇന്ത്യന്‍ ടീമില്‍ കാര്യമായ മാറ്റങ്ങളുണ്ടാകും. ആദ്യ രണ്ട് മത്സരങ്ങളിലും ഇടം കിട്ടാത്തവരെ ഇന്ന് പരീക്ഷിച്ചേക്കും. രാത്രി എട്ടിനാണ് മത്സരം.