ദോഹ: ഖത്തറില്‍ വാഹനാപകടങ്ങള്‍ ഇ സര്‍വീസ് വഴി റിപ്പോര്‍ട്ട് ചെയ്യാന്‍ പുതിയ സംവിധാനമൊരുക്കിയതായി ഖത്തര്‍ ട്രാഫിക് വിഭാഗം അറിയിച്ചു. ആഭ്യന്തര മന്ത്രാലയത്തിന് കീഴിലെ 'മെട്രാഷ് ടു' വഴി വാഹനാപകടങ്ങള്‍ ട്രാഫിക് വിഭാഗത്തെ അറിയിക്കാനുളള സംവിധാനം ആരംഭിച്ചതായി ഡയരക്ടര്‍ ജനറല്‍ ഓഫ് ട്രാഫിക് ബ്രിഗേഡിയര്‍ മുഹമ്മദ് സാദ് അല്‍ ഖറജി വാര്‍ത്തസമ്മേളനത്തില്‍ അറിയിച്ചു.

രണ്ട് വാഹനങ്ങള്‍ തമ്മില്‍ കൂട്ടിയിടിക്കുന്ന ചെറിയ അപകടങ്ങളാണ് ഈ സംവിധാനം വഴി രജിസ്റ്റര്‍ ചെയ്യാന്‍ സാധിക്കുകയെന്നും ആഭ്യന്തര മന്ത്രാലയത്തിന്റെ കൂടുതല്‍ സേവനങ്ങള്‍ ഇലക്ട്രാണിക് വല്‍ക്കരിക്കുന്നതിന്റെ ഭാഗമായാണ് ഈ സൗകര്യങ്ങള്‍ ഏര്‍പ്പെടുത്തിയതെന്നും അദ്ദേഹം പറഞ്ഞു. അപകടങ്ങള്‍ റിപ്പോര്‍ട്ട് ചെയ്യാനുളള നടപടി ക്രമങ്ങള്‍ ലഘൂകരിക്കാനും അപകടങ്ങള്‍ കാരണമുണ്ടാകുന്ന ഗതാഗതകുരുക്ക് ഒഴിവാക്കാനും ഇതിലൂടെ സാധിക്കുമെന്നും അദ്ദേഹം പറഞ്ഞു.

രണ്ട് വാഹനങ്ങള്‍ കൂട്ടിയിടിച്ചാല്‍ അപകടത്തിന്റെ നാലില്‍ കുറയാത്ത ഫോട്ടോ മെട്രാഷ് ടു വഴി ട്രാഫിക് ഇന്‍വെസ്റ്റിഗേഷന്‍ വിഭാഗത്തിലേക്ക് അയക്കണം. അപകടത്തില്‍പ്പെട്ട വാഹനങ്ങളുടെ നമ്പര്‍, അപകടം നടന്ന സ്ഥലം എന്നിവ വ്യക്തമാക്കുന്നതാവണം ഫോട്ടോ. ഫോട്ടോ  ലഭിച്ചാല്‍ അതു സംബന്ധമായ സന്ദേശം ട്രാഫിക് വിഭാഗത്തില്‍ നിന്നും ലഭിക്കും. ട്രാഫിക് വിഭാഗം ഫോട്ടോ പരിശോധന നടത്തുകയും അപകടത്തിന്റെ കാരണക്കാരെ നിര്‍ണ്ണയിക്കുകയും ചെയ്യും. ഇത് സംബന്ധമായ സന്ദേശം അപകടത്തില്‍പ്പെട്ട ഇരകൂട്ടര്‍ക്കും അയക്കും.

തുടര്‍ന്ന് അപകടത്തിന് കാരണക്കരാനായ വാഹന ഉടമയുടെ ഇന്‍ഷൂറന്‍സ് കമ്പനിയില്‍  നിന്നും വാഹനത്തിന്റെ വാഹനത്തിന്റെ അറ്റകുറ്റപണിക്കാവശ്യമായ നടപടികള്‍ സ്വീകരിപ്പിക്കുമെന്നും അദ്ദേഹം വാര്‍ത്താസമ്മേളനത്തില്‍ വ്യക്തമാക്കി. ഈ സേവനം അറബിയെക്കൂടാതെ മലയാളത്തിലും ഇംഗ്ലീഷ്, ഫ്രഞ്ച്, സ്പാനിഷ്, ഉര്‍ദു ഭാഷകളിലും ലഭ്യമാവും.

പുതിയ സംവിധാനം കൂടി നിലവില്‍ വന്നതോടെ റോഡപകടങ്ങള്‍ റിപ്പോര്‍ട്ട് ചെയ്യാന്‍ നാല് സംവിധാനങ്ങള്‍ രാജ്യത്ത് നടപ്പിലാക്കിയതായി മഅ്മൂറ ട്രാഫിക് വിഭാഗം മോ്രവി ക്യാപ്റ്റന്‍ അബ്ദുല്ല മിസാദ് പറഞ്ഞു. മെട്രാഷ് ടു വിന് പുറമെ, ഇന്‍ഷൂറന്‍സ് കമ്പനികളിലുളള ട്രാഫിക് വിഭാഗത്തിലും ട്രാഫിക് ഇന്‍വെസ്റ്റിഗേഷന്‍ ഓഫീസില്‍ നേരിട്ട് എത്തിയും അപകടങ്ങര്‍ റിപ്പോര്‍ട്ട് ചെയ്യാം. അതിനും പുറമെ അപകടം നടന്ന സ്ഥലത്ത് ട്രാഫിക് പെട്രോള്‍ വിഭാഗം എത്തുന്നതുവരെ കാത്തിരിന്നും അപകടങ്ങള്‍ ട്രാഫിക് വിഭാഗത്തെ അറിയിക്കാമെന്നും അദ്ദേഹം പറഞ്ഞു. പുതിയ സംവിധാനത്തിന്റെ പ്രചാരണത്തിനായി വിവിധ മാര്‍ഗങ്ങള്‍ സ്വീകരിക്കുമെന്നും അധികൃതര്‍ വ്യക്തമാക്കി. വാര്‍ത്താസമ്മേളനത്തില്‍ ആഭ്യന്തര മന്ത്രാലയത്തിലെ ഇന്‍ഫര്‍മേഷന്‍ വിഭാഗം ഡയരക്ടര്‍ ്രബിഗേഡിയര്‍ ഇബ്രാഹിം മുഹമ്മദ് അല്‍ ഹറമിയും പങ്കെടുത്തു.