മാഹി: സുപ്രീം കോടതി വിധിയുടെ അടിസ്ഥാനത്തില്‍ മാഹി ദേശീയപാതയോരത്തെ അടച്ചുപൂട്ടിയ മദ്യശാലകള്‍ കേരള ഹൈക്കോടതി വിധിയെ തുടര്‍ന്ന് വീണ്ടും തുറക്കാന്‍ നടത്തുന്ന നീക്കത്തിനെതിരേ നിയമ നടപടി സ്വീകരിക്കുമെന്ന് മയ്യഴിക്കൂട്ടം ഭാരവാഹികള്‍. കേരള ഹൈക്കോടതിയുടെ ഉത്തരവിനെ അടിസ്ഥാനമാക്കി പുതുച്ചേരി സര്‍ക്കാരിലും മറ്റും സമ്മര്‍ദം ചെലുത്തി മാഹിയിലെ മദ്യശാലകള്‍ വീണ്ടും തുറക്കാനുള്ള ശ്രമങ്ങള്‍ ഉണ്ടായാല്‍ അനുമതി നല്‍കുന്ന സര്‍ക്കാരിനെതിരേയും ഉദ്യോഗസ്ഥര്‍ക്കെതിരേയും സുപ്രീം കോടതിയില്‍ കോടതിയലക്ഷ്യ നടപടികള്‍ കൈക്കൊള്ളും. നിലവില്‍ ദേശീയ പാതയോരത്തെ ബാറുകളും മദ്യശാലകളും നിലനിര്‍ത്താനായി ദേശീയ-സംസ്ഥാന പാതകളെ ഡീനോട്ടിഫൈ ചെയ്യാനുള്ള നടപടികളെ ചോദ്യം ചെയ്തു ഏപ്രിലില്‍ സമര്‍പ്പിച്ച ഹരജി സുപ്രീം കോടതി അവധിക്കുവച്ച അവസരത്തില്‍ ധൃതിയില്‍ കേരള ഹൈക്കോടതിയില്‍ നിന്നുണ്ടായ വിധി ആശ്ചര്യം ജനിപ്പിക്കുന്നതാണ് വിധിയുടെ പകര്‍പ്പ് കിട്ടിയതിനു ശേഷം തുടര്‍ നടപടികള്‍ സുപ്രീം കോടതി അഭിഭാഷകന്‍ മനോജ് വി. ജോര്‍ജുമായി ആലോചിച്ചു തീരുമാനിക്കുന്നതായിരുക്കുമെന്നും ഭാരവാഹികള്‍ അറിയിച്ചു.