കൊച്ചി: രാജ്കുമാര്‍ കസ്റ്റഡി മരണക്കേസില്‍ റീ പോസ്റ്റുമോര്‍ട്ടം റിപ്പോര്‍ട്ടുള്‍പ്പെടെയുള്ള മെഡിക്കല്‍ രേഖകള്‍ വ്യാഴാഴ്ച ഹാജരാക്കണമെന്നു ഹൈക്കോടതി. നെടുങ്കണ്ടത്ത് പൊലിസ് കസ്റ്റഡിയില്‍ രാജ്കുമാറിന് നേരിടേണ്ടിവന്നത് അതിക്രൂരമായ പീഡനമായിരുന്നുവെന്ന് സര്‍ക്കാര്‍ ഹൈക്കോടതിയില്‍ വ്യക്തമാക്കി. കേസില്‍ റിമാന്‍ഡില്‍ കഴിയുന്ന മുന്‍ എസ്.ഐ സാബുവിന്റെ ജാമ്യാപേക്ഷ പരിഗണിക്കുമ്പോഴായിരുന്നു സര്‍ക്കാര്‍ നിലപാടറിയിച്ചത്. എസ്.ഐ സാബുവിന്റെ ജാമ്യഹരജിയെ സര്‍ക്കാര്‍ കോടതിയില്‍ എതിര്‍ത്തു.
അറസ്റ്റു ചെയ്ത രാജ്കുമാറിനെ മജിസ്‌ട്രേറ്റിനു മുന്നില്‍ ഹാജരാക്കിയതുള്‍പ്പെടെയുള്ള വിശദാംശങ്ങളും ഹാജരാക്കണമെന്നു കോടതി നിര്‍ദേശിച്ചു.രാജ്കുമാറിനെ കോടതിയില്‍ ഹാജരാക്കിയപ്പോള്‍ നടക്കാന്‍ പോലും കഴിയാത്ത സ്ഥിതിയിലായിരുന്നുവെന്നും സര്‍ക്കാര്‍ കോടതിയെ ബോധിപ്പിച്ചതിനെ തുടര്‍ന്നാണ് ഇതു സംബന്ധിച്ച വിശദാംശങ്ങള്‍ ഹാജരാക്കാന്‍ നിര്‍ദേശിച്ചത്.

രാജ്കുമാറിനെ കസ്റ്റഡിയിലെടുത്തത് മേലുദ്യോഗസ്ഥരുടെ അറിവോടെയായിരുന്നുവെന്നും കസ്റ്റഡിയില്‍ നിന്ന് ജയിലില്‍ എത്തിക്കുന്നതുവരെ രാജ്കുമാറിന് പരിക്കുണ്ടായിട്ടില്ലെന്നും കേസിലെ ഒന്നാം പ്രതിയായ സാബു ജാമ്യാപേക്ഷയില്‍ ഉന്നയിച്ചു. സാബു ദേവികുളം സബ് ജയിലില്‍ റിമാന്‍ഡില്‍ കഴിയുകയാണ്.