ന്യൂഡല്‍ഹി: ഇ.വി.എം ചലഞ്ചിങ്ങില്‍ പാര്‍ട്ടികള്‍ വോട്ടിങ് യന്ത്രത്തിന്റെ പ്രവര്‍ത്തനത്തില്‍ സംപ്തൃതരാണെന്ന് ചീഫ് ഇലക്ഷന്‍ കമ്മീഷണര്‍ നസീം സെയ്ദി വ്യക്തമാക്കി. തെരഞ്ഞെടുപ്പ് കമ്മീഷന്റെ വെല്ലുവിളി ഏറ്റെടുത്ത് രംഗത്തെത്തിയ എന്‍.സി.പി, സി.പി.എം പാര്‍ട്ടികള്‍ വോട്ടിങ് യന്ത്രം ഹാക്ക് ചെയ്യാന്‍ ശ്രമിച്ചില്ലെന്ന് കമ്മീഷന്‍.

ചലഞ്ചിങ് വിജയകരമാണോ അല്ലയോ എന്ന് വ്യക്തമാക്കാന്‍ അദ്ദേഹം തയ്യാറായില്ല. ഇലക്ഷന്‍ പ്രവര്‍ത്തനങ്ങള്‍ കാര്യക്ഷമമാക്കാനുള്ള തുടര്‍ പ്രക്രിയയുടെ ഭാഗം മാത്രമാണിതെന്നും അദ്ദേഹം പറഞ്ഞു. വോട്ടിങ് യന്ത്രത്തില്‍ സി.പി.എം മോക് പോള്‍ ആണ് നടത്തിയതെങ്കില്‍ എന്‍.സി.പി അംഗങ്ങള്‍ വോട്ടിങ് യന്ത്രങ്ങളെ കുറിച്ച് കൂടുതല്‍ അറിയാനും പഠിക്കാനുമാണ് എത്തിയതെന്നും അദ്ദേഹം പറഞ്ഞു. വോട്ടിങ് യന്ത്രങ്ങളുടെ പ്രവര്‍ത്തനത്തില്‍ സി.പി.എം പൂര്‍ണ തൃപ്തി പ്രകടിപ്പിച്ചെന്നും നസീം സെയ്ദി പറഞ്ഞു.

നേരത്തെ നടന്ന ചില തെരഞ്ഞെടുപ്പുകളില്‍ വോട്ടിങ് യന്ത്രങ്ങളില്‍ തിരിമറി നടന്നിട്ടുണ്ടെന്ന ആരോപണത്തെ തുടര്‍ന്നാണ് ഇലക്ഷന്‍ കമ്മീഷന്‍ ചലഞ്ചിങ് നടത്തിയത്. ഏഴ് ദേശീയ പാര്‍ട്ടികളെയും 29 സംസ്ഥാന പാര്‍ട്ടികളെയും ക്ഷണിച്ചിരുന്നു. എന്നാല്‍, എന്‍.സി.പിയും സി.പി.എമ്മും മാത്രമാണ് ചലഞ്ചിങ്ങില്‍ പങ്കെടുത്തത്.