നെടുമ്പാശേരി: ചെങ്ങമനാട് പൊലിസ് സ്റ്റേഷനിലെ എ.എസ്.ഐയെ ആളൊഴിഞ്ഞ പൊലിസ് ക്വാര്‍ട്ടേഴ്‌സില്‍ തൂങ്ങി മരിച്ച നിലയില്‍ കണ്ടെത്തി. ആലുവ തെക്കെ വാഴക്കുളം ചെമ്പറക്കി ആലപ്പാട് പൗലോസ് ജോണിനെയാണ് (52) ക്വാര്‍ട്ടേഴ്‌സിലെ ഫാനില്‍ തൂങ്ങി മരിച്ച നിലയില്‍ കണ്ടെത്തിയത്. പൊലിസ് സ്റ്റേഷന് പിന്നിലാണ് ക്വാര്‍ട്ടേഴ്‌സ്. സാധാരണയായി ഇവിടെ പൊലിസുകാര്‍ താമസിക്കാറില്ല. യൂനിഫോം മാറുന്നതിനും വിശ്രമത്തിനും മറ്റുമാണ് ഇത് ഉപയോഗിച്ചിരുന്നത്. ബുധനാഴ്ച വൈകിട്ട് ഡ്യൂട്ടി കഴിഞ്ഞ് വീട്ടിലേക്ക് മടങ്ങാതെ പൗലോസ് ഇവിടെ തങ്ങുകയായിരുന്നു. ഇന്നലെ രാവിലെ 8.30 ഓടെ ഡ്യൂട്ടിക്കെത്തിയ ഉദ്യോഗസ്ഥനാണ് മൃതദേഹം കണ്ടത്. സംഭവം അറിഞ്ഞയുടന്‍ ജില്ലാ റൂറല്‍ എസ്.പി കാര്‍ത്തിക്, ഡിവൈ.എസ്.പി വേണു എന്നിവര്‍ സ്റ്റേഷനിലെത്തി.

ലോക്‌സഭ തെരഞ്ഞെടുപ്പിന് ശേഷം ചെങ്ങമനാട് സ്റ്റേഷനില്‍ ചാര്‍ജെടുത്ത സര്‍ക്കിള്‍ ഇന്‍സ്‌പെക്ടര്‍ പൗലോസിനെ മാനസികമായി പീഡിപ്പിച്ചിരുന്നുവെന്ന് ബന്ധുക്കള്‍ മൊഴി നല്‍കിയിട്ടുണ്ട്. ഭാര്യ: സിനി പോള്‍ (അധ്യാപിക, ആലുവ മഹിളാലയം ഹയര്‍ സെക്കന്‍ഡറി സ്‌കൂള്‍), മക്കള്‍: ജിയ (വിദ്യാര്‍ഥിനി, ഫിസാറ്റ്, അങ്കമാലി), ജെലിന്‍ (പ്‌ളസ്ടു വിദ്യാര്‍ഥി, ആലുവ മഹിളാലയം ഹയര്‍സെക്കന്‍ഡറി സ്‌കൂള്‍).