വാഷിങ്ടണ്‍: മാധ്യമപ്രവര്‍ത്തകനായ ജമാല്‍ കഷോഗിയുടെ തിരോധാന വിഷയത്തില്‍ ഇടപെടുമെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. സംഭവത്തില്‍ സഊദി രാജാവുമായി ഫോണില്‍ സംസാരിക്കുമെന്ന് അദ്ദേഹം വ്യക്തമാക്കി.
എന്താണ് സംഭവിച്ചതെന്നു പുറത്തുവരണം. വളരെ ഭീതിജനകമായ സാഹചര്യമാണിത്. സത്യാവസ്ഥ അറിയാന്‍ ജനം കാത്തിരിക്കുകയാണെന്നു പറഞ്ഞ അദ്ദേഹം, സഊദി രാജാവുമായി എന്താണ് സംസാരിക്കുകയെന്ന ചോദ്യത്തിനു മറുപടി പറഞ്ഞില്ല. എന്നാല്‍, സഊദി കോണ്‍സുലേറ്റില്‍വച്ചു കഷോഗി കൊല്ലപ്പെട്ടെന്നു തെളിഞ്ഞാല്‍ അമേരിക്കയുടെ ഭാഗത്തുനിന്നു ശക്തമായ നടപടിയുണ്ടാകുമെന്ന് അദ്ദേഹം മറ്റൊരു അഭിമുഖത്തില്‍ വ്യക്തമാക്കി.