കാളികാവ്: മലയോരത്ത് മേഖലയില്‍ കാട്ടാനകളുടെ വിളയാട്ടത്തില്‍ കര്‍ഷകര്‍ ദുരിതത്തില്‍. സൗരോര്‍ജ വേലിയിട്ട ഭാഗം കടന്ന് ജനവാസ കേന്ദ്രം വരെ ആനകളെത്തി. കൂവെള്ളൂര്‍ ജെന്‍ എബ്രഹാം, മാരൂര്‍ ബിജു തോമസ് തുടങ്ങിയവയരുടെ നൂറിലധികം കവുങ്ങും വാഴകളും ഉള്‍പെടെയുള്ള വിളകളാണ് ആനകള്‍ നശിപ്പിച്ചിട്ടുള്ളത്. തോട്ടത്തിലെ വിളകള്‍ നശിപ്പിച്ചതിന് പുറമെ ജനം തിങ്ങിപ്പാര്‍ക്കുന്ന വീടുകളുടെ അടുത്തവരെ കാട്ടാനകൂട്ടം എത്തിയിട്ടുണ്ട്.
കുലച്ച വാഴകള്‍ കവുങ്ങുകളും ചവിട്ടി വീഴ്ത്തി ജലാംശം കൂടുതലുള്ള ഭാഗം നോക്കി ഭക്ഷിക്കുകയാണ് ചെയ്യുന്നത്. ചേനപ്പാടി, വേപ്പിന്‍കുന്ന്, വള്ളിപ്പുള്ള ഭാഗങ്ങളിലാണ് ആനകള്‍ പതിവായിറങ്ങുന്നത്. മലവാരത്തിന് വളരെയധികം തഴെ സുരക്ഷിതമായി കൃഷി ചെയ്ത് പോന്നിരുന്ന ഭാങ്ങളിലാണ് നേരംപുലരുവോളം ആനക്കൂട്ടം കൃഷി നശിപ്പിച്ചത്. സൗരോര്‍ജ വേലിയും ആനകള്‍ക്ക് തടസമായിട്ടില്ല. മലവാരത്തിന് താഴെ വരെയുള്ള വേലികടന്ന് ആന കൃഷിയിടത്തിലേക്ക് എത്തിയത് മലയോര കര്‍ഷകരെ ദുരിതത്തിലാക്കിയിട്ടുണ്ട്.