തൃശൂര്‍: ആര്‍.എസ്.എസ് പരിപാടിയില്‍ പങ്കെടുത്ത സി.പി.എം ഇരിങ്ങാലക്കുട എം.എല്‍.എ കെ.യു അരുണന് പാര്‍ട്ടിയുടെ പരസ്യശാസന.
ഇരിങ്ങാലക്കുട എരിയാ കമ്മിറ്റിയുടെ നിര്‍ദേശപ്രകാരം ജില്ലാ സെക്രട്ടേറിയറ്റ് യോഗം ചേര്‍ന്നാണ് പരസ്യശാസന നല്‍കിയതെന്ന് സി.പി.എം ജില്ലാ സെക്രട്ടറി കെ. രാധാകൃഷ്ണന്‍ മാധ്യമപ്രവര്‍ത്തകരോട് പറഞ്ഞു. ഇത്തരം പരിപാടികളില്‍ ഇനി പങ്കെടുക്കരുതെന്ന് നിര്‍ദേശം നല്‍കിയിട്ടുണ്ട്. എം.എല്‍.എയുടെ നടപടി തെറ്റായ സന്ദേശമാണ് പ്രവര്‍ത്തകര്‍ക്ക് നല്‍കുന്നതെന്നും സെക്രട്ടേറിയറ്റ് മുന്നറിയിപ്പ് നല്‍കി.  ആര്‍.എസ്.എസ് പരിപാടിയില്‍ പങ്കെടുത്തത് തെറ്റായിപ്പോയെന്നും തെറ്റിദ്ധരിക്കപ്പെട്ടെന്നുമുള്ള എം.എല്‍.എയുടെ വിശദീകരണം സേക്രട്ടേറിയറ്റ് അംഗീകരിച്ചു.
 എം.എല്‍.എ പറഞ്ഞതുപോലുള്ള ബ്രാഞ്ച് സെക്രട്ടറി ഇരിങ്ങാലക്കുടയിലോ ഊരകത്തോ ഇല്ല. പാര്‍ട്ടി പ്രവര്‍ത്തകര്‍ക്ക് പൊതുവായ മാര്‍ഗനിര്‍ദേശങ്ങള്‍ നല്‍കിയിട്ടുണ്ടെന്നും ഇത് എം.പിമാര്‍, എം.എല്‍.എമാര്‍ ഉള്‍പ്പെടെയുള്ള ജനപ്രതിനിധികള്‍ക്കും ബാധകമാണെന്നും കെ. രാധാകൃഷ്ണന്‍ പറഞ്ഞു.  കഴിഞ്ഞ 31നാണ് പുല്ലൂര്‍ ഊരകത്ത് ആര്‍.എസ്.എസ് ശാഖയുടെ നേതൃത്വത്തില്‍ നടത്തിയ നോട്ടുപുസ്തക വിതരണ ചടങ്ങില്‍ അരുണന്‍ പങ്കെടുത്തത്. ആര്‍.എസ്.എസ് ഊരകം ശാഖസേവാപ്രമുഖായി പ്രവര്‍ത്തിച്ചിരുന്ന പി.എസ് ഷൈനിന്റെ സ്മരണയ്ക്കായാണ് പരിപാടി സംഘടിപ്പിച്ചത്. അരുണന്‍ യോഗത്തില്‍ പങ്കെടുത്തത് അന്നുതന്നെ വിവാദമായിരുന്നു.
അരുണന്റെ വിശദീകരണം തൃപ്തികരമല്ലെന്ന് സംസ്ഥാന സെക്രട്ടേറിയറ്റ് നേരത്തേ വിലയിരുത്തിയിരുന്നു. ഇതേത്തുടര്‍ന്നാണ് എരിയാ കമ്മിറ്റി നടപടിയെടുക്കാന്‍ ജില്ലാ കമ്മിറ്റിയോട് ആവശ്യപ്പെട്ടത്.