കൊല്‍ക്കത്ത: സംസ്ഥാനത്തിന്റെ തനതായ സംസ്‌കാരത്തെ പ്രതിനിധാനം ചെയ്യുന്ന പാട്ടെഴുതാനൊരുങ്ങി പശ്ചിമബംഗാള്‍ മുഖ്യമന്ത്രി മമത ബാനര്‍ജി. സംഗീത സംവിധാനം ചെയ്യുന്നതും മമത തന്നെയാണ്. പ്രശസ്തരായ ഏതെങ്കിലും പിന്നണിഗായകരായിരിക്കും ഗാനം ആലപിക്കുക.

 പാട്ടിന് പുറമെ സംസ്ഥാനത്തിന് വേണ്ടി പ്രത്യക എംബ്ലവും മമത രൂപകല്‍പന ചെയ്യുന്നുണ്ട്. ബംഗാളിന്റെ വ്യത്യസ്ത സംസ്‌കാരത്തെ സമന്വയിപ്പിക്കുന്ന എംബ്ലവും ഗാനവുമാണ് സംസ്ഥാനത്തിന് വേണ്ടി മമത ഒരുക്കുന്നത്. ബംഗാളിന്റെ തനതായ സംസ്‌കാരത്തെ പ്രതിനിധാനം ചെയ്യുന്ന എംബ്ലത്തിന്റെ അവസാനഘട്ട പണിപ്പുരയിലാണ് മമത ബാനര്‍ജി ഇപ്പോള്‍

പശ്ചിമബംഗാളില്‍ സ്വാധീനമുറപ്പിക്കാന്‍ ബി.ജെ.പി ശക്തമായ ശ്രമം നടത്തുന്ന സമയത്താണ് സംസ്ഥാനം പ്രതിനിധാനം ചെയ്യുന്ന ആശയത്തെയും സ്വത്വത്തെയും സമന്വയിപ്പിച്ച് മമത പാട്ടെഴുതുന്നത്. നേരത്തെ ബംഗാളിന്റെ സംസ്‌കാരത്തെ തകര്‍ക്കാന്‍ ബി.ജെ.പി ശ്രമം നടത്തുകയാണെന്ന് മമത ആരോപിച്ചിരുന്നു. ബി.ജെ.പിയുടെ ഹിന്ദുത്വ അജണ്ടകളെ പ്രകടമായി വിമര്‍ശിക്കുന്ന തരത്തിലാണ് വരികള്‍ ചിട്ടപ്പെടുത്തിയിരിക്കുന്നത്.