മോണ്‍ട്രിയല്‍: ടെന്നിസ് ലോകത്ത് ചരിത്രങ്ങള്‍ മാറ്റിക്കുറിച്ച് നദാലും ഫെഡററും ശ്രദ്ധ നേടുമ്പോള്‍ ഇത്തവണയും റെക്കോഡ് പിറന്നു. ഇന്നലെ പുരുഷന്‍മാരുടെ റോജേഴ്‌സ് കപ്പ് എന്ന് വിശേഷിപ്പക്കുന്ന മോണ്‍ട്രിയല്‍ മാസ്റ്റേഴ്‌സ് ഫൈനലിലെത്തിയതോടെ ഏറ്റവും കൂടുതല്‍ തവണ എ.ടി.പി മാസ്റ്റേഴ്‌സ് 1000ന്റെ ഫൈനല്‍സില്‍ എത്തുന്ന താരമെന്ന റെക്കോഡ് സ്വന്തമാക്കി നിലവിലെ ലോക രണ്ടാം നമ്പര്‍ താരം നദാല്‍. ഇക്കാര്യത്തില്‍ തന്റെ ഉറ്റ വെല്ലുവിളിയായ ഫെഡററെയാണ് പ്രാനിഷ് താരം പിന്നിലാക്കിയത്. ഇന്നലെ സെമിയില്‍ താരത്തിനെതിരേ കളിക്കാനിരുന്ന മോന്‍ഫില്‍സ് പരുക്കുമൂലം പിന്‍മാറിയതിനെ തുടര്‍ന്ന് വാക്കോവര്‍ ലഭിക്കുകയായിരുന്നു. ലോക ഒന്‍പതാം നമ്പര്‍ താരം ഡാനില്‍ മെഡ്വദേവാണ് ഫൈനലില്‍ സ്പാനിഷ് താരത്തിന്റെ എതിരാളി. ആദ്യമായാണ് നദാല്‍ മെഡ്വദേവിനെ എതിരിടുന്നത്. ജയിച്ചാല്‍ താരത്തിന്റെ അഞ്ചാം മോണ്‍ട്രിയല്‍ മാസ്റ്റേഴ്‌സ് കിരീടമാവും അത്. താരത്തിന്റെ 51ാം എ.ടി.പി 1000 മാസ്റ്റേഴ്‌സ് ഫൈനലാണിത്. ഫെഡററും (50) ജോക്കോവിച്ചുമാണ് (49) പിന്നില്‍. കൂടാതെ ഇന്ന് ജയിച്ചാല്‍ ഏറ്റവും കൂടുതല്‍ എ.ടി.പി മാസ്റ്റേഴ്‌സ് 1000 കിരീടങ്ങളുടെ പട്ടികയില്‍ മുന്‍പന്തിയിലുള്ള താരത്തിന് കിരീടങ്ങളുടെ എണ്ണം വര്‍ധിപ്പിക്കാനാവും. നിലവില്‍ ഈ വിഭാഗത്തില്‍ 34 കിരീടമാണ് താരത്തിന്റഎ പേരിലുള്ളത്. 

നേരത്തേ ഇറ്റലിയുടെ ഫാബിയാനോ ഫോഗ്നിനിയെ 2-6,6-1,6-2ന് പരാജയപ്പെടുത്തിയാണ് നദാല്‍ സെമിയില്‍ പ്രവേശിച്ചത്.