പാട്യാല: ഫെഡറേഷന്‍ കപ്പ് സീനിയര്‍ അത്‌ലറ്റിക്‌സ് ചാംപ്യന്‍ഷിപ്പിന്റെ അവസാന ദിനത്തില്‍ കേരളത്തിന് രണ്ട് വീതം സ്വര്‍ണവും വെള്ളിയും നാല് വെങ്കലവുമടക്കം എട്ട് മെഡലുകള്‍. പുരുഷ, വനിതാ വിഭാഗം 1500 മീറ്ററില്‍ കേരളത്തിനായി പി.യു ചിത്ര, ജിന്‍സന്‍ ജോണ്‍സന്‍ എന്നിവരാണ് സുവര്‍ണ നേട്ടം സ്വന്തമാക്കിയത്. ചിത്ര 4.26.48 സെക്കന്‍ഡിലും ജിന്‍സന്‍ 3.48.49 സെക്കന്‍ഡിലും ഫിനിഷ് ചെയ്തു.
പുരുഷന്‍മാരുടെ 10000 മീറ്ററില്‍ കേരളത്തിന്റെ ടി ഗോപിക്ക് വെള്ളി മെഡല്‍. 29.55.67 സെക്കന്‍ഡില്‍ ഫിനിഷ് ചെയ്താണ് ഗോപിയുടെ നേട്ടം. പുരുഷ വിഭാഗം ട്രിപിള്‍ ജംപില്‍ കേരളത്തിനായി കാര്‍ത്തിക് യു 16.37 മീറ്റര്‍ താണ്ടി വെള്ളി നേടി.
പുരുഷ വിഭാഗം 400 മീറ്ററില്‍ കേരളത്തിനായി സച്ചിന്‍ റോബി വെങ്കലം നേടി. 46.87 സെക്കന്‍ഡിലാണ് താരം ഫിനിഷ് ചെയ്തത്. വനിതകളുടെ 100 മീറ്ററില്‍ മെര്‍ലിന്‍ ജോസഫും(11.68) പുരുഷ വിഭാഗം 100 മീറ്ററില്‍ അനുരൂപ് ജോണും (10.60) കേരളത്തിന് വെങ്കലം സമ്മാനിച്ചു. ഹെപ്റ്റത്‌ലണില്‍ കേരളത്തിന്റെ ലിക്‌സി ജോസഫും വെങ്കലം നേടി.