ന്യൂഡല്‍ഹി: ഗുസ്തി താരം ബജ്‌റംഗ് പൂനിയക്ക് ഇന്ത്യയിലെ ഏറ്റവും ഉയര്‍ന്ന കായിക ബഹുമതിയായ ഖേല്‍രത്‌നയ്ക്ക് ശുപാര്‍ശ. ബോക്‌സിങ് താരം മേരി കോമും ഫുട്‌ബോള്‍ താരം ബൈച്ചൂങ് ബൂട്ടിയയും അടങ്ങുന്ന 12 അംഗ കമ്മിറ്റിയാണ് താരത്തെ ഖേല്‍രത്‌ന അവാര്‍ഡിന് ശുപാര്‍ശ ചെയ്തത്. താരത്തിന്റെ പേര് ഈ അവാര്‍ഡിനായി ഐകകണ്‌ഠ്യേന തീരുമാനിക്കുകയായിരുന്നു. ഖേല്‍രത്‌ന അവാര്‍ഡ് ജേതാവിനെ പ്രഖ്യാപിക്കുന്നതോടൊപ്പം ദ്രോണാചാര്യ, അര്‍ജുന അവാര്‍ഡ് ജേതാവിനെയും പ്രഖ്യാപിക്കും.
നിലവിലെ കോമണ്‍വെല്‍ത്ത് ഏഷ്യന്‍ ചാംപ്യനായ പൂനിയ ലോക ചാംപ്യന്‍ഷിപ്പില്‍ രണ്ട് തവണ ഇന്ത്യക്കായി മെഡല്‍ സ്വന്തമാക്കിയിട്ടുണ്ട്. 2020ലെ ടോക്കിയോ ഒളിംപിക്‌സിലെ സ്വര്‍ണ പ്രതീക്ഷ കൂടിയാണ്.