തൊടുപുഴ: 17കാരി ആത്മഹത്യ ചെയ്ത സംഭവത്തില്‍ യുവതി അറസ്റ്റില്‍. കോലാനി വാഴക്കാലായില്‍ ദീപ അനൂപി(32) നെയാണ് കരിങ്കുന്നം എസ്.ഐ. പി.എസ് നാസര്‍ അറസ്റ്റ് ചെയ്തത്. പെണ്‍കുട്ടിയുടെ വീട്ടുകാര്‍ നല്‍കിയ പരാതിയെ തുടര്‍ന്നുള്ള അന്വേഷണത്തിലാണ് പ്രതികളിലൊരാളായ യുവതി പിടിയിലായത്. കേസിലെ മുഖ്യപ്രതി ഉടുമ്പന്നൂര്‍ പരീക്കല്‍ അജിത്ത് ഷാജി (26) യെ പിടികൂടാനുണ്ടെന്നും ഇയാള്‍ വിദേശത്തേക്ക് കടന്നതായും പൊലിസ് പറഞ്ഞു.
സംഭവത്തെക്കുറിച്ച് പൊലിസ് പറയുന്നത്: കഴിഞ്ഞ ജൂലൈ 28നാണ് പെണ്‍കുട്ടിയെ വീട്ടിനുള്ളില്‍ തൂങ്ങി മരിച്ച നിലയില്‍ കണ്ടെത്തിയത്. പെണ്‍കുട്ടിയുടെ വീടിന് മുകള്‍ നിലയിലാണ് പ്രതി ദീപ താമസിച്ചിരുന്നത്. ഇവര്‍ കരിമണ്ണൂരിലെ സ്വകാര്യ ആശുപത്രിയിലെ ജോലിക്കാരിയാണ്. ബസ് ഡ്രൈവറായ അജിത്തുമായി ദീപക്ക് അടുപ്പമുണ്ടായിരുന്നു. ദീപയുടെ സഹായത്തോടെ അജിത്ത് പെണ്‍കുട്ടിയുമായി അടുത്തു. തന്റെ വീട്ടിലും കരിമണ്ണൂരിലും അജിത്തിന് പെണ്‍കുട്ടിയുമായി സംഗമിക്കാനുള്ള സാഹചര്യം ദീപ ഒരുക്കിക്കൊടുത്തു. ഇതിനിടെ സഹപാഠിയായ യുവാവ് പെണ്‍കുട്ടിയുടെ വീട്ടിലെത്തിയിരുന്നു. ഇതറിഞ്ഞ അജിത്തും ദീപയും പെണ്‍കുട്ടിയെ ശകാരിക്കുകയും ഭീഷണിപ്പെടുത്തുകയും ചെയ്തു. ഇതില്‍ മനംനൊന്ത് പെണ്‍കുട്ടി ആത്മഹത്യ ചെയ്യുകയായിരുന്നുവെന്ന് പൊലിസ് പറഞ്ഞു. അറസ്റ്റിലായ ദീപയെ റിമാന്‍ഡ് ചെയ്തു.