പട്‌ന: ജെ.എന്‍.യു മുന്‍ യൂനിയന്‍ നേതാവ് കനയ്യ കുമാറിനും സംഘത്തിനും നേരെ ബജ്‌റങ്ദള്‍ പ്രവര്‍ത്തകരുടെ ആക്രമണം. ബിഹാറിലെ ബെഗുസരായ് ജില്ലയില്‍വച്ചാണ് ആക്രമണമുണ്ടായത്.
കനയ്യ കുമാറും സംഘവും സഞ്ചരിച്ച വാഹനത്തിനുനേരെയാണ് ആക്രമണമുണ്ടായത്. നിരവധി വാഹനങ്ങള്‍ തകര്‍ന്നിട്ടുണ്ട്. സംഭവത്തില്‍ ആറുപേര്‍ക്ക് പരുക്കേറ്റിട്ടുണ്ട്. ബജ്‌റങ്ദള്‍ ജില്ലാ പ്രസിഡന്റ് ശുഭം ഭരദ്വാജ് ഉള്‍പ്പെടെ രണ്ടുപേര്‍ക്ക് ഗുരുതരമായി പരുക്കേറ്റിട്ടുണ്ട്. മന്‍സൂര്‍ചക്കില്‍ നിന്ന് ഒരു പരിപാടിയില്‍ പങ്കെടുത്തു വരികയായിരുന്ന കനയ്യ കുമാറിന്റെ വാഹന വ്യൂഹം തടഞ്ഞതാണ് അക്രമത്തിന് കാരണമായത്. ഇരു വിഭാഗവും പൊലിസില്‍ പരാതി നല്‍കിയിട്ടുണ്ട്.
അടുത്ത ലോക്‌സഭാ തെരഞ്ഞെടുപ്പില്‍ ബിഹാറിലെ ബെഗുസരായിയില്‍ നിന്ന് സി.പി.ഐ സ്ഥാനാര്‍ഥിയായി കനയ്യ കുമാര്‍ മത്സരിക്കാനിരിക്കുകയാണ്. കഴിഞ്ഞ ദിവസം പട്‌ന എയിംസില്‍ അക്രമം നടത്തിയെന്ന് ചൂണ്ടിക്കാട്ടി കനയ്യ കുമാറിനെതിരേ പൊലിസ് കേസെടുത്തിരുന്നു.