തിരുവനന്തപുരം: കായിക ഓര്‍ഡിനന്‍സില്‍ തുടര്‍നടപടികള്‍ ഉടന്‍ ഉണ്ടാകുമെന്ന് കായിക മന്ത്രി ഇ.പി ജയരാജന്‍. സ്‌പോര്‍ട്‌സ് കൗണ്‍സിലിന് തിരുവനന്തപുരത്ത് പുതിയ ആസ്ഥാനമന്ദിരം നിര്‍മിക്കുമെന്നും മന്ത്രി വാര്‍ത്താ സമ്മേളനത്തില്‍ പറഞ്ഞു. കായിക താരങ്ങള്‍ക്ക് നല്‍കിയ ജോലി വാഗ്ദാനത്തില്‍നിന്ന് സര്‍ക്കാര്‍ പിന്നോട്ടില്ല. പി.യു ചിത്ര അടക്കം എല്ലാ കായിക താരങ്ങള്‍ക്കും ജോലി നല്‍കും. ജോലി നല്‍കാനുള്ള നടപടികള്‍ പുരോഗമിക്കുകയാണ്.
നീന്തല്‍താരം ഒളിംപ്യന്‍ സാജന്‍ പ്രകാശിന് 22 മാസമായി ശമ്പളം ലഭിക്കുന്നില്ലെന്ന പരാതി തന്റെ ശ്രദ്ധയില്‍പ്പെട്ടിട്ടില്ലെന്നും ഇക്കാര്യം പരിശോധിക്കുമെന്നും മന്ത്രി പറഞ്ഞു. ഓപറേഷന്‍ ഒളിംപിയ പദ്ധതി സുഗമമായി നടക്കുന്നതായും ആര്‍ച്ചറി, ഷൂട്ടിങ് ഇനങ്ങളില്‍ മാത്രമാണ് ഇനി പരിശീലനം ആംഭിക്കാനുള്ളതെന്നും സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ പറഞ്ഞു.