കരുനാഗപ്പള്ളി: കാര്‍ നിയന്ത്രണം വിട്ട് ഇടിച്ചു കയറി സ്‌കൂള്‍ വിദ്യാര്‍ത്ഥി മരച്ചു. മരുതൂര്‍ക്കുളങ്ങര തെക്ക്, കൊച്ചാണ്ടിശ്ശേരി വടക്കേതറയില്‍ രാജുസുഗന്ധി ദമ്പതികളുടെ മകന്‍ അലന്‍ദേവ് രാജ് (14) ആണ് മരണപ്പെട്ടത്. കരുനാഗപ്പള്ളി ബോയ്‌സ് ഹൈസ്‌കൂള്‍ ഒന്‍പതാം ക്ലാസ് വിദ്യാര്‍ത്ഥിയായിരുന്നു.

ഞായറാഴ്ച വൈകിട്ട് 6.40 ന് എസ്.വിമാര്‍ക്കറ്റിനു സമീപമായിരുന്നു അപകടം. ട്യൂഷന്‍ കഴിഞ്ഞ് സൈക്കിളില്‍ വീട്ടിലേക്ക് വരവേവിദ്യാര്‍ത്ഥിയുടെ മേല്‍ നിയന്ത്രണം വിട്ട കാര്‍ ഇടിക്കുകയായിരുന്നു. ഗുരുതരമായി പരുക്കേറ്റ വിദ്യാര്‍ത്ഥിയെ കരുനാഗപ്പള്ളിയിലെ സ്വകാര്യ ആശുപത്രിയിലും തുടര്‍ന്ന് തിരുവനന്തപുരത്തെ സ്വകാര്യ മെഡിക്കല്‍ കോളേജിലും പ്രവേശിപ്പിച്ചെങ്കിലും ചികിത്സയിലിരിക്കെ തിങ്കളാഴ്ച വെളുപ്പിനു 3.30 ന് മരണപ്പെടുകയായിരുന്നു.

കരുനാഗപ്പള്ളി ബോയ്‌സ് ഹയര്‍ സെക്കന്ററി സ്‌കൂളില്‍ പൊതുദര്‍ശനത്തിനു വച്ച മൃതദേഹത്തില്‍ എ.എം ആരിഫ് എം.പി, ആര്‍ രാമചന്ദ്രന്‍ എം.എല്‍.എ, നഗരസഭാ ചെയര്‍പേഴ്‌സണ്‍ എം ശോഭന, സ്‌കൂള്‍ അധികൃതര്‍, വിദ്യാര്‍ത്ഥികള്‍ തുടങ്ങിയവര്‍ അന്തിമോപചാരം അര്‍പ്പിച്ചു.വൈകിട്ട് 7 മണിയോടെ മൃതദേഹം വീട്ടുവളപ്പില്‍ സംസ്‌കരിച്ചു. സഹോദരന്‍: യു പി ജി എസ് വിദ്യാര്‍ത്ഥി അമല്‍ദേവരാജ്.