കോട്ടയം: ഉന്നതാധികാര സമിതി അംഗങ്ങള്‍ ഉള്‍പ്പെടെ ജോസ് കെ. മാണി പക്ഷത്തെ 21 പേരെ സസ്‌പെന്‍ഡ് ചെയ്ത കേരള കോണ്‍ഗ്രസ് (എം) വര്‍ക്കിങ് ചെയര്‍മാന്‍ പി.ജെ ജോസഫിന്റെ നടപടിക്ക് കോടതിയുടെ സ്റ്റേ.
ജോസഫ് വിഭാഗം നടത്താനിരുന്ന ഉന്നതാധികാര സമിതി യോഗവും കോട്ടയം മുന്‍സിഫ് കോടതി സ്റ്റേ ചെയ്തിട്ടുï്. ജോസ് കെ. മാണി വിഭാഗം നല്‍കിയ ഹരജിയിലാണ് സ്റ്റേ അനുവദിച്ചത്. ജോസ് കെ. മാണി വിഭാഗത്തെ നേതാക്കളെ പുറത്താക്കിയ ശേഷമാണ് ജോസഫ് ഇന്ന് കൊച്ചിയില്‍ ഉന്നതാധികാര സമിതി യോഗം വിളിച്ചത്
നാല് ഉന്നതാധികാര സമിതി അംഗങ്ങള്‍, ആറ് ജില്ലാ പ്രസിഡന്റുമാര്‍, 11 സ്റ്റിയറിങ് കമ്മിറ്റി അംഗങ്ങള്‍ എന്നിങ്ങനെ ജോസ് കെ. മാണി വിഭാഗത്തിലെ 21 പേരെയാണ് പി.ജെ ജോസഫ് സസ്‌പെന്‍ഡ് ചെയ്തത്. ജോസ് കെ. മാണിയെ ചെയര്‍മാനായി തെരഞ്ഞെടുത്ത കോട്ടയത്ത് ചേര്‍ന്ന സംസ്ഥാന കമ്മിറ്റി യോഗത്തില്‍ പങ്കെടുത്തതിന്റെ പേരിലാണ് പി.ജെ ജോസഫ് നടപടി സ്വീകരിച്ചത്. യോഗത്തില്‍ പങ്കെടുത്ത നടപടി നിയമവിരുദ്ധമാണെന്നാണ് പി.ജെ ജോസഫിന്റെ നിലപാട്. എന്നാല്‍, ഈ നടപടിയെ ജോസ് കെ. മാണി വിഭാഗം അംഗീകരിച്ചില്ല. തുടര്‍ന്ന് ഉന്നതാധികാര സമിതി അംഗം ബാബു ജോസഫ് കോട്ടയം മുന്‍സിഫ് കോടതിയെ സമീപിക്കുകയായിരുന്നു.
അതിനിടെ, കേരള കോണ്‍ഗ്രസ് (എം) ചെയര്‍മാനായി ജോസ് കെ. മാണിയെ തെരഞ്ഞെടുത്ത നടപടിക്കെതിരേ പി.ജെ ജോസഫ് വിഭാഗം നല്‍കിയ പരാതി പരിഗണിച്ച് ഇടുക്കി മുന്‍സിഫ് കോടതി നല്‍കിയ സ്റ്റേ ഉത്തരവിനെ ചോദ്യംചെയ്ത് നല്‍കിയ അപ്പീല്‍ കട്ടപ്പന സബ് കോടതി ഫയലില്‍ സ്വീകരിച്ചു.