കാരക്കസ്: വെനസ്വേലയെ തകര്‍ത്തെറിഞ്ഞ അതിശക്തമായ ഇരട്ട ഭൂചലനത്തില്‍ മരണസംഖ്യ 1430 കടന്നു. അരലക്ഷത്തിലധികം (51,000) ആളുകളെയാണ് കാണാതായിരിക്കുന്നത്. കെട്ടിടാവശിഷ്ടങ്ങള്‍ക്കിടയില്‍ കുടുങ്ങിക്കിടക്കുന്നവര്‍ക്കായുള്ള തെരച്ചില്‍ തുടരുകയാണ്. രക്ഷാപ്രവര്‍ത്തനം 72 മണിക്കൂര്‍ പിന്നിട്ടു. ഇനിയാരെയെങ്കിലും ജീവനോടെ പുറത്തെടുക്കാനാകുമെന്ന പ്രതീക്ഷയും മങ്ങുകയാണ്. 

ബുധനാഴ്ചയാണ് റിക്ടര്‍ സ്‌കെയിലില്‍ 7.2ഉം 7.5ഉം തീവ്രത രേഖപ്പെടുത്തിയ ഭൂചലനങ്ങള്‍ ഉണ്ടാവുന്നത്. ദുരന്തം ഏറ്റവും രൂക്ഷമായി ബാധിച്ചത് ലാ ഗ്വെയ്റ തീരപ്രദേശത്തെയും തലസ്ഥാനമായ കാരക്കാസിനെയുമാണ്. സര്‍ക്കാര്‍ രക്ഷാസേനയുടെ അപര്യാപ്തത മൂലം പ്രദേശവാസികള്‍ തന്നെയാണ് പലയിടത്തും കോണ്‍ക്രീറ്റ് പാളികള്‍ക്കും അവശിഷ്ടങ്ങള്‍ക്കുമിടയില്‍ തെരച്ചില്‍ നടത്തുന്നത്. രക്ഷആപ്രവര്‍ത്തനത്തിന് ആവശ്യമായ ഉപകരണങ്ങളുടെ അപര്യാപ്തതയും അനുഭവപ്പെടുന്നുണ്ട്. ഗതാഗതക്കുരുക്കും തകര്‍ന്ന റോഡുകളും രക്ഷാപ്രവര്‍ത്തനത്തെ ബാധിച്ചു. ദുരന്തബാധിത മേഖലയിലേക്കുള്ള പ്രവേശനം അധികൃതര്‍ കര്‍ശനമായി നിയന്ത്രിച്ചിട്ടുണ്ട്. 3300ലധികം ആളുകള്‍ക്ക് പരുക്കേറ്റതായും 243 പേരെ രക്ഷപ്പെടുത്തിയതായുമാണ് ഔദ്യോഗിക കണക്ക്.

ALSO READ: മരണ സംഖ്യ 900 കടന്നു; വെനസ്വേലയെ തകര്‍ത്തെറിഞ്ഞ് ഭൂകമ്പം; നിരവധി പേര്‍ ഇപ്പോഴും മണ്ണിനടയില്‍; രക്ഷാപ്രവര്‍ത്തനം ദുഷ്‌കരം 

വിദേശ രാജ്യങ്ങളില്‍ നിന്നുള്ള 1600ഓളം വിദഗ്ധര്‍  രക്ഷാപ്രവര്‍ത്തനങ്ങള്‍ക്കായി വെനസ്വേലയില്‍ എത്തിയിട്ടുണ്ട്. ദുരന്തബാധിത പ്രദേശങ്ങളില്‍ സൈന്യത്തെ വിന്യസിച്ചിരിക്കുകയാണ്. ഭക്ഷണവും വെള്ളവും എത്തിച്ചുനല്‍കുന്നുണ്ടെന്ന് ആക്ടിങ് പ്രസിഡന്റ് ഡെല്‍സി റോഡ്രിഗസ് അറിയിച്ചു. ദുരിതാശ്വാസപ്രവര്‍ത്തനങ്ങള്‍ക്കുള്ള കൂടുതല്‍ സാമഗ്രികള്‍ എത്തിക്കുന്നതിനായി സൈമണ്‍ ബൊളിവര്‍ അന്താരാഷ്ട്ര വിമാനത്താവളത്തിലെ തകര്‍ന്ന റണ്‍വേ അറ്റകുറ്റപ്പണികള്‍ പൂര്‍ത്തിയാക്കി തുറന്നിട്ടുണ്ട്.

വാര്‍ത്താവിനിമയ ബന്ധങ്ങളും ഇന്റര്‍നെറ്റും താറുമാറായതും പ്രതിസന്ധി ഇരട്ടിയാക്കിയിരിക്കുകയാണ്. ഇന്റര്‍നാഷണല്‍  രാജ്യത്തെ 6.7 ദശലക്ഷത്തോളം ആളുകളെയാണ് ഭൂചലനം ബാധിച്ചിരിക്കുന്നതെന്നാണ് ഓര്‍ഗനൈസേഷന്‍ ഫോര്‍ മൈഗ്രേഷന്റെ റിപ്പോര്‍ട്ട്. 4.7 മുതല്‍ 8.7 ബില്യണ്‍ ഡോളര്‍ വരെ സാമ്പത്തിക നഷ്ടം സംഭവിച്ചതായി ഐക്യരാഷ്ട്രസഭ റിപ്പോര്‍ട്ടില്‍ പറയുന്നു. ഇതിനിടെ ശനിയാഴ്ചയും തുടര്‍ചലനം അനുഭവപ്പെട്ടിരുന്നു. 4.8 തീവ്രത രേഖപ്പെടുത്തിയ ഭൂചലനമാണ് അനുഭവപ്പെട്ടത്. ഇത്  ജനങ്ങളില്‍ വീണ്ടും ഭീതി നിറച്ചിട്ടുണ്ട്. വീടുകളിലേക്ക് മടങ്ങാന്‍ ജനങ്ങള്‍ തയ്യാറാവുന്നില്ലെന്നും റിപ്പോര്‍ട്ടുകള്‍ വ്യക്തമാക്കുന്നു.

venezuela struggles after powerful twin earthquakes killed more than 1430 people and left over 51000 missing as rescue teams continue search operations.