കോഴിക്കോട്: ഡബിള്‍ ഹോഴ്‌സിന്റെ മട്ട ബ്രോക്കണ്‍ അരിയില്‍ മായമില്ലെന്ന് പരിശോധനയില്‍ തെളിഞ്ഞതായി കമ്പനി അധികൃതര്‍ അറിയിച്ചു. അരിയില്‍ മായം കലര്‍ത്തിയിട്ടുണ്ടെന്ന വ്യാജ വാര്‍ത്ത പ്രചരിച്ചതിനെ തുടര്‍ന്ന് ഫുഡ് സേഫ്റ്റി കമ്മിഷനറുടെ നിര്‍ദേശ പ്രകാരം അരിയുടെ സാംപിളുകള്‍ ശേഖരിച്ച് സര്‍ക്കാര്‍ അനലിറ്റിക്കല്‍ ലബോറട്ടറികളിലേക്ക് അയച്ചിരുന്നു. ഇതില്‍ തിരുവനന്തപുരം അനലിറ്റിക്കല്‍ ലബോറട്ടറിയിലേക്ക് അയച്ച ഒരു സാംപിളിന്റെ പരിശോധനാ റിപ്പോര്‍ട്ടില്‍ അരിയില്‍ തവിടിന്റെ അംശം കൂടുതലായി കണ്ടതിനെ തുടര്‍ന്ന് ആ ബാച്ചിലുള്ളവ വിപണിയില്‍നിന്നു പിന്‍വലിക്കാന്‍ ഫുഡ്‌സേഫ്റ്റി കമ്മിഷനര്‍ ഉത്തരവിട്ടിരുന്നു.
ഇതിനെതിരേ കമ്പനി ഹൈക്കോടതിയെ സമീപിക്കുകയും അരി വിപണിയില്‍ നിന്നും പിന്‍വലിക്കാനുള്ള ഫുഡ്‌സേഫ്റ്റി കമ്മിഷനറുടെ ഉത്തരവ് ഹൈക്കോടതി സ്‌റ്റേ ചെയ്യുകയുമായിരുന്നു. ഹൈക്കോടതി നിര്‍ദേശ പ്രകാരം ഫുഡ്‌സേഫ്റ്റി അധികൃതര്‍ ഇതേ ബാച്ചിലുള്ള അരിയുടെ സാംപിള്‍ മൈസൂരുവിലെ റെഫറല്‍ ലബോറട്ടറി (സി.എഫ്.ടി.ആര്‍.ഐ)യില്‍ നടത്തിയ പരിശോധനയിലാണ് മട്ട ബ്രോക്കണ്‍ അരിയില്‍ മായമില്ലെന്നും അരി തികച്ചും ഫുഡ് സേഫ്റ്റി സ്റ്റാന്‍ഡേര്‍ഡിന് അനുസൃതമാണെന്നും തെളിഞ്ഞത്. വ്യാജ പ്രചാരണവുമായി രംഗത്തു വന്നവര്‍ക്കെതിരേ നിയമ നടപടികളുമായി മുന്നോട്ടുപോകുമെന്നും കമ്പനി വ്യക്തമാക്കി.