മുളങ്കുന്നത്തുകാവ്: മില്‍മ ഡയറിയുടെ മിനി വാന്‍ ഓടിക്കൊണ്ടിരിക്കെ കത്തിനശിച്ചു. തൃശൂര്‍ ഗവ. എന്‍ജിനീയറിങ് കോളജിനു മുന്നില്‍ ഇന്നലെ ഉച്ചയ്ക്ക് ഒന്നോടെയാണ് അപകടം. പാല്‍ ഉല്‍പ്പന്നങ്ങള്‍ വിതരണം ചെയ്ത് രാമവര്‍മപുരത്തെ ഡയറി യൂനിറ്റിലേക്കു തിരികെ വരുമ്പോഴാണ് അപകടമുണ്ടായത്. തീയും പുകയും കണ്ട് ഡ്രൈവര്‍ റോഡരികില്‍ വാന്‍ ഒതുക്കി നിര്‍ത്തിയതിനാല്‍ വന്‍ അപകടം ഒഴിവായി. എന്‍ജിന്‍ പൂര്‍ണമായും കത്തിനശിച്ചു. രണ്ടരലക്ഷം രൂപയുടെ നഷ്ടം കണക്കാക്കുന്നു. സമീപത്തെ അഗ്നിശമനസേന അക്കാദമിയില്‍നിന്നും തൃശൂര്‍ നഗരത്തില്‍ നിന്നും ഫയര്‍ എന്‍ജിനുകള്‍ എത്തിയാണ് തീയണച്ചത്. വാനിന്റെ സമീപത്തായി കിടന്നിരുന്ന മറ്റൊരു വാഹനം തീകണ്ട ഉടന്‍ മാറ്റിയിട്ടതുകൊണ്ട് മറ്റൊരു അപകടവും ഒഴിവായി.