പാടന്തറ: മദ്യശാല മാറ്റി സ്ഥാപിക്കണമെന്നാവശ്യപ്പെട്ട് പാടന്തറ കറക്കപാളി കൈതമട്ടത്തില്‍ സ്‌കൂള്‍ വിദ്യാര്‍ഥികള്‍ ധര്‍ണ നടത്തി. വിദ്യാലയങ്ങളില്‍ നിന്ന് അവധിയെടുത്തായിരുന്നു വിദ്യാര്‍ഥികള്‍ ധര്‍ണ നടത്തിയത്. സ്ത്രീകളടക്കമുള്ള നൂറുക്കണക്കിന് രക്ഷിതാക്കളും സമരത്തില്‍ പങ്കെടുത്തു. പൊലിസ് സ്ഥലത്തെത്തി സമരം അവസാനിപ്പിക്കാന്‍ ആവശ്യപ്പെട്ടെങ്കിലും വിദ്യാര്‍ഥികള്‍ തയാറായില്ല.
മദ്യശാല മാറ്റുന്നത് വരെ സമരം നടത്തുമെന്ന് സമരക്കാര്‍ പറഞ്ഞു. ഗൂഡല്ലൂര്‍ സി.ഐ ശക്തിവേലുവിന്റെ നേതൃത്വത്തില്‍ ഇവിടെ കനത്ത പൊലിസ് സുരക്ഷ ഏര്‍പ്പെടുത്തിയിരുന്നു. നൂറുകണക്കിന് കുടുംബങ്ങള്‍ താമസിക്കുന്ന ജനവാസ കേന്ദ്രത്തില്‍ നിന്ന് മദ്യശാല മാറ്റി സ്ഥാപിക്കണമെന്നാണ് ജനങ്ങള്‍ ആവശ്യപ്പെടുന്നത്. രണ്ട് ഘട്ടങ്ങളിലായി ഇതുമായി ബന്ധപ്പെട്ട് നാട്ടുകാര്‍ സമരം നടത്തുകയും ജില്ലാ കലക്ടര്‍ക്ക് ഇതുസംബന്ധിച്ച് നിവേദനം നല്‍കുകയും ചെയ്തിരുന്നു.