പവിത്രമായ റമദാന്റെ വിലപ്പെട്ട ഓരോ ദിനരാത്രങ്ങളും നമ്മില്‍നിന്ന് കടന്നുപോകുമ്പോള്‍ അതിന്റെ അന്തഃസത്ത ഉള്‍ക്കൊണ്ട് തന്നെയാണൊ വ്രതാനുഷ്ടാനം നടക്കുന്നതെന്ന ആത്മപരിശോധന നടത്താന്‍ ഓരോ വിശ്വാസിക്കും ബാധ്യതയുണ്ട്. ത്യാഗമനസ്ഥിതിയോടു കൂടെയാകുമ്പോള്‍ മാത്രമേ ആരാധനകളുടെ അന്തഃസത്ത നേടാനാവൂ. സമയവും സമ്പത്തും ഒരു മുസല്‍മാനെ സംബന്ധിച്ചേടത്തോളം വളരെ പ്രധാനപ്പെട്ടതാണല്ലൊ. അതുരണ്ടും സ്വേഷ്ടപ്രകാരമല്ല അല്ലാഹുവിന്റെ ലോകനാഥനായ അല്ലാഹുവിന്റെ ഇഷ്ടത്തിനനുസരിച്ച് ചെലവഴിക്കാനേ വിശ്വാസിക്ക് അധികാരമുള്ളൂ. മാത്രമല്ല മനുഷ്യന്റെ കഷ്ടപ്പാടുകള്‍ അറിയാനും അതിനു പരിഹാരം ഉണ്ടാക്കുന്നതിലേക്ക് വിശ്വാസികളെ പ്രോത്സാഹിപ്പിക്കാനും കൂടിയാണ് പരിശുദ്ധ റമദാന്‍ അല്ലാഹു നമുക്ക് കനിഞ്ഞേകിയത്. അതായത്, അപരന്റെ വിഷമങ്ങള്‍ അറിയുന്ന ഒരു മനസുണ്ടാക്കുകയെന്നതാണ് നോമ്പുകൊണ്ട് അല്ലാഹു ലക്ഷ്യമാക്കുന്ന നിരവധി കാര്യങ്ങളിലൊന്ന്. അതിനു അല്ലാഹു തആല നല്‍കിയ അനുഗ്രങ്ങള്‍ അവന്റെ പ്രീതിയില്‍ തന്നെ ചെലവഴിക്കണമെന്നും അത്തരത്തിലുള്ളവര്‍ക്കു മാത്രമേ ഉന്നതവിജയം നേടാനാകൂ എന്നും പരിശുദ്ധ ഖുര്‍ആന്‍ നമുക്കു നല്‍കുന്ന സന്ദേശം ഒരിക്കലും വിശ്വാസി വിസ്മരിച്ചുകൂട. 

ഇത്തരത്തിലുള്ള വിലപ്പെട്ട പാഠങ്ങള്‍ നാം ഉള്‍ക്കൊണ്ട് ഒരു പുതിയ ഉത്തമ ജീവിതത്തിലേക്കുള്ള ഉയര്‍ത്തെഴുനേല്‍പ്പ് നടത്താന്‍ ഈ റമദാനോടെ നമുക്ക് സാധ്യമാകണം. ഏതു നിമിഷം മരണം സംഭവിച്ചാലും നമ്മെ സ്വര്‍ഗത്തിലേക്ക് ആനയിക്കപ്പെടുന്ന അവസ്ഥ എത്രമേല്‍ സന്തോഷകരമാണ് ?. അതിനു സാധിക്കുന്ന വിശ്വാസിയല്ലേ യഥാര്‍ത്ഥ ബുദ്ധിമാന്‍ ?. പുണ്യമാസം അതിനുള്ള സാഹചര്യമൊരുക്കുന്നതാവണം. തിരുനബി (സ) പറഞ്ഞു. 'മുന്‍ഗാമികളായ ഒരു പ്രവാചകരുടെ സമൂഹത്തിനും ലഭിക്കാത്ത അഞ്ചുകാര്യങ്ങള്‍ എന്റെ സമൂഹത്തിന് കാരുണ്യവാനായ അല്ലാഹു നല്‍കി. റമദാന്റെ ഒന്നാമത്തെ രാത്രി അല്ലാഹു എന്റെ സമുദായത്തിന് അനുഗ്രഹവര്‍ഷം നടത്തും. അതില്‍ ഉള്‍പ്പെട്ടാല്‍ ഒരു കാലത്തും അവന്‍ ശിക്ഷിക്കപ്പെടുകയില്ല,
നോമ്പുകാരന്റെ വായയുടെ ഗന്ധം കസ്തൂരിയേക്കാളും സൗരഭ്യമാണ്. എല്ലാ രാത്രിയിലും നോമ്പുകാര്‍ക്കുവേണ്ടി മലക്കുകള്‍ പ്രാര്‍ഥിച്ചുകൊണ്ടിരിക്കും. അവര്‍ക്കുവേണ്ടി സ്വര്‍ഗം അലങ്കരിക്കാന്‍ അല്ലാഹു കല്‍പിക്കും. അവസാനദിനമായാല്‍ അവര്‍ക്ക് തെറ്റുകള്‍ പൊറുത്തുകൊടുക്കുകയും ചെയ്യും.' (ബൈഹഖി-ശുഅ്ബുല്‍ ഈമാന്‍ 360). ഇത്തരമൊരു സൗഭാഗ്യം അതിനു അര്‍ഹതപ്പെട്ടവര്‍ക്കല്ലാതെ എങ്ങനെ ലഭിക്കും ?. അതിനാല്‍ ശേഷിക്കുന്ന വിശുദ്ധ രാവുകളില്‍ കര്‍മങ്ങളില്‍ മുഴുകി യജമാനന്റൈ തൃപ്തി കരഗതമാക്കുവാന്‍ ഒരോ വിശ്വാസിയും തയ്യാറാവണം. ജീവിതം സേവനമാക്കുക. സര്‍വ്വശക്തനായ അല്ലാഹു അനുഗ്രഹിക്കട്ടെ... ആമീന്‍.

(സമസ്ത മുബല്ലിഅ് ആണ് ലേഖകന്‍)