തേഞ്ഞിപ്പലം: ജില്ലാ സ്‌കൂള്‍ കായിക മേളക്ക് കാലിക്കറ്റ് സര്‍വകലാശാല സി.എച്ച് മുഹമ്മദ് കോയ സിന്തറ്റിക്‌സ് സ്റ്റേഡിയത്തില്‍ തുടക്കം. ആദ്യ ദിനത്തില്‍ ഐഡിയല്‍ കടകശ്ശേരിയുടെ മികവില്‍ എടപ്പാള്‍ ഉപജില്ല ബഹുദൂരം മുന്നില്‍. 41 ഇനങ്ങള്‍ സമാപിച്ചപ്പോള്‍ 21 സ്വര്‍ണവും 14 വെള്ളിയും ആറ് വെങ്കലവുമടക്കം 178 പോയിന്റാണ് ഒന്നാം സ്ഥാനത്തുള്ള എടപ്പാളിനുള്ളത്.
മൂന്ന് സ്വര്‍ണവും മൂന്ന് വെള്ളിയും നാല് വെങ്കലവുമായി 44 പോയിന്റുമായി കിഴിശ്ശേരി ഉപജില്ല രണ്ടാം സ്ഥാനത്തും മൂന്ന് സ്വര്‍ണവും അഞ്ച് വെള്ളിയും ആറ് വെങ്കലവുമായി 42 പോയിന്റുമായി തിരൂര്‍ ഉപജില്ല മൂന്നാം സ്ഥാനത്തും നാല് സ്വര്‍ണവും രണ്ട് വെള്ളിയും രണ്ട് വെങ്കലവുമായി 39 പോയിന്റുമായി കുറ്റിപ്പുറം ഉപജില്ല നാലാം സ്ഥാനത്തുമാണ്. ഒരു വെങ്കല മെഡലിലൂടെ ഒരു പോയന്റ് മാത്രമുള്ള മലപ്പുറം ഉപജില്ലയാണ് ഏറ്റവും പിറകില്‍. 17 ഉപജില്ലകളില്‍ നിന്നായി 3500ല്‍പരം കായിക താരങ്ങള്‍ പങ്കെടുക്കുന്ന മേളയില്‍ ഐഡിയല്‍ കടകശ്ശേരിയിലെ താരങ്ങള്‍ വാരിക്കൂട്ടിയ പോയിന്റുകളുടെ കരുത്തിലാണ് എടപ്പാള്‍ ഉപജില്ല ആദ്യ ദിനത്തില്‍ തന്നെ ഏറെ മുന്നിലെത്തിയത്.
സ്‌കൂളുകളില്‍ 153 പോയിന്റ് നേടിയ ഐഡിയല്‍ കടകശ്ശേരി ഒന്നാം സ്ഥാനത്തും 16 പോയിന്റ് നേടിയ തവനൂര്‍ കെ.എം.ജി.വി.എച്ച്.എസ്.എസ് രണ്ടാം സ്ഥാനത്തും 14 പോയിന്റ് നേടിയ പരിയാപുരം സെന്റ് മേരീസ് എച്ച്.എസ്.എസ് മൂന്നാം സ്ഥാനത്തുമാണ്. മേളയുടെ സമാപന ദിനമായ ഇന്ന് 36 ഫൈനലുകളാണ് നടക്കാനുള്ളത്. പ്രളയത്തെ തുടര്‍ന്ന് ചെലവ് ചുരുക്കി നടത്തിയ പരിപാടികളില്‍ ഉദ്ഘാടന ചടങ്ങ് ഒഴിവാക്കി. പകരം തിരൂരങ്ങാടി വിദ്യഭ്യാസ ജില്ലാ ഓഫിസര്‍ സജിതാ കുമാരി പതാക ഉയര്‍ത്തിയതോടെയാണ് പരിപാടികള്‍ക്ക് തുടക്കമായത്.

ആഞ്ഞൊന്നെറിയാന്‍ മൈതാനമില്ല; എന്നിട്ടും ബിന്‍ഷാദിന് പൊന്നിന്‍ തിളക്കം

തേഞ്ഞിപ്പലം: മുഹമ്മദ് ബിന്‍ഷാദിന് ആഞ്ഞൊന്നെറിയാന്‍ പാകത്തിലുള്ള മൈതാനമില്ലാഞ്ഞിട്ടും ജില്ലാ കായിക മേളയില്‍ ജൂനിയര്‍ ആണ്‍കുട്ടികളുടെ വിഭാഗത്തില്‍ ജാവലിന്‍ ത്രോയില്‍ പൊന്നിന്‍ തിളക്കം നേടാനായി. കല്ലുങ്ങല്‍പറമ്പ് എം.എസ്.എം.എച്ച്.എസ്.എസിലെ താരമാണ് ബിന്‍ഷാദ്.
സ്‌കൂളില്‍ 150 മീറ്റര്‍ നീളം മാത്രമുള്ള മൈതാനത്താണ് എല്ലാ ദിവസും രാവിലെ ആറര മുതല്‍ ഒന്‍പത്‌വരെയുള്ള പരിശീലനം. 39.09 മീറ്റര്‍ എറിഞ്ഞാണ് സ്വര്‍ണമെഡല്‍ സ്വന്തമാക്കിയത്. പ്ലസ്‌വണ്‍ കൊമേഴ്‌സ് വിദ്യാര്‍ഥിയായ താരത്തിന്റെ പരിശീലകന്‍ കായികാധ്യാപകന്‍ വി.എ ഉബൈദുല്ലയാണ്. 2017ല്‍ ജില്ലയിലും 2018 അമച്വറിലും മത്സരിച്ചിരുന്നു. ഇതേ സ്‌കൂളില്‍ നിന്ന് 35ഓളം കായിക താരങ്ങള്‍ മീറ്റില്‍ മത്സരിക്കുന്നുണ്ട്. അശ്കര്‍ ഉമൈബ ദമ്പതികളുടെ മകനാണ് ബിന്‍ഷാദ്.