റിയാദ്: ലോകത്തെ പ്രമുഖ കമ്പനികള്‍ പങ്കടുക്കുന്ന മൂന്ന് ദിവസത്തെ സഊദി ആഗോള നിക്ഷേപക സംഗമത്തിന് റിയാദില്‍ തുടക്കമായി. ഫ്യൂച്ചര്‍ ഇന്‍വെസ്റ്റ്‌മെന്റ് ഇനീഷ്യേറ്റിവ് എന്ന പരിപാടി 'ഡാവോസ് ഇന്‍ ദ ഡെസേര്‍ട്ട് ' എന്ന പേരിലാണ് അരങ്ങേറുന്നത്.
റിയാദിലെ റിറ്റ്‌സ് കാല്‍ട്ടണ്‍ ഹോട്ടലിലെ വ്യത്യസ്ത വേദികളിലായാണ് സമ്മേളനം. ആദ്യ ദിനത്തില്‍ തന്നെ അന്‍പത് ബില്യണ്‍ ഡോളറിന്റെ പദ്ധതികള്‍ക്കാണ് വിവിധ രാജ്യങ്ങളുമായി കരാറില്‍ ഏര്‍പ്പെട്ടിരിക്കുന്നത്. ഇതില്‍ തന്നെ 12 എണ്ണം മെഗാ പദ്ധതികളാണ്. എണ്ണ, ഗ്യാസ് ഖന ന പദ്ധതികള്‍ക്കായി ട്രാഫിഗുര, ടോട്ടല്‍, ഹ്യുണ്ടായി, നോറിക്കോ, ഹാലിബര്‍ട്ടന്‍, ബേക്കര്‍ ഹഗ്‌സ് തുടങ്ങിയ കമ്പനികളുമായാണ് ആദ്യ ദിനത്തില്‍ കരാറില്‍ ഒപ്പുവച്ചത്.
തുടര്‍ ദിവസങ്ങളില്‍ കൂടുതല്‍ നിക്ഷേപ പദ്ധതികളില്‍ ഒപ്പു വെക്കും. 40 രാജ്യങ്ങളില്‍ നിന്നായി 150 നിക്ഷേപ വിദഗ്ധരാണ് പരിപാടിയില്‍ പങ്കെടുക്കുന്നത്. റഷ്യയില്‍ നിന്നാണ് ഏറ്റവും കൂടുതല്‍ കമ്പനികളുടെ പ്രതിനിധികളുള്ളത്.
സഊദി വിഷന്‍ 2030 ന്റെ ഭാഗമായുള്ള പരിപാടിയുടെ അടുത്ത ഘട്ടത്തില്‍ 200 ബില്യണ്‍ ഡോളറാണ് സഊദി ലക്ഷ്യമിടുന്നതെന്ന് നേരത്തെ പ്രഖ്യാപിച്ചിരുന്നു. കിരീടാവകാശിയും പ്രതിരോധ മന്ത്രിയുമായ മുഹമ്മദ് ബിന്‍ സല്‍മാന്റെ നേതൃത്വത്തില്‍ കഴിഞ്ഞ വര്‍ഷവും സമാന രീതിയില്‍ സമ്മേളനം നടത്തിയിരുന്നു.