ഐ.എം.ജി ഡയരക്ടര്‍ ആക്കിയേക്കും

തിരുവനന്തപുരം: സസ്‌പെന്‍ഷനില്‍ കഴിയുന്ന മുന്‍ വിജിലന്‍സ് ഡയരക്ടര്‍ ഡി.ജി.പി ജേക്കബ് തോമസിനെ സര്‍വിസില്‍ തിരിച്ചെടുക്കാന്‍ ശുപാര്‍ശ. ഇക്കാര്യം ആവശ്യപ്പെട്ടുകൊണ്ടുള്ള ഫയല്‍ ആഭ്യന്തരവകുപ്പ് അഡിഷണല്‍ ചീഫ് സെക്രട്ടറി സുബ്രതാ ബിശ്വാസ് ചീഫ് സെക്രട്ടറിക്ക് കൈമാറി.
അന്തിമ തീരുമാനം എടുക്കുക മുഖ്യമന്ത്രി പിണറായി വിജയനാകും. ഡി.ജി.പി റാങ്കിലുള്ള സംസ്ഥാനത്തെ ഏറ്റവും മുതിര്‍ന്ന ഉദ്യോഗസ്ഥനായ ജേക്കബ് തോമസിനെ സര്‍വിസില്‍ തിരിച്ചെടുക്കാന്‍ കേന്ദ്ര അഡ്മിനിസ്‌ട്രേറ്റീവ് ട്രിബ്യൂണല്‍ വിധിച്ചിരുന്നു. ഇതിന്റെ അടിസ്ഥാനത്തിലാണ് നടപടി. ട്രിബ്യൂണലിന്റെ തീരുമാനമുണ്ടായിട്ടും സംസ്ഥാനം അനുകൂലമായി പ്രതികരിക്കാത്തതിനെ തുടര്‍ന്ന് ജേക്കബ് തോമസ് വീണ്ടും ട്രിബ്യൂണലിനെ സമീപിച്ചിരുന്നു. ഇതിനുപിന്നാലെയാണ് ജേക്കബ് തോമസിനെ തിരിച്ചെടുക്കാനുള്ള ആഭ്യന്തര വകുപ്പിന്റെ തീരുമാനം.

നേരത്തെ സെന്‍കുമാറിന്റെ കേസില്‍ സംഭവിച്ചതുപോലെ കോടതി ഇടപെടല്‍ ഉണ്ടാകാതിരിക്കാന്‍ ട്രിബ്യൂണല്‍ ഉത്തരവിനെതിരേ അപ്പീല്‍ പോകേണ്ടെന്ന് സര്‍ക്കാര്‍ തീരുമാനിച്ചിട്ടുണ്ട്. ജേക്കബ് തോമസിനെ നേരത്തേ വഹിച്ചിരുന്ന ഐ.എം.ജി ഡയരക്ടര്‍ ആക്കുമെന്നാണ് സൂചന.
ജേക്കബ് തോമസ് നേരത്തേ സ്വയംവിരമിക്കലിന് അപേക്ഷ നല്‍കിയിരുന്നു. ഇത് കേന്ദ്ര പഴ്‌സണല്‍ മന്ത്രാലയത്തിന് സര്‍ക്കാര്‍ കൈമാറിയിരുന്നു. എന്നാല്‍, മൂന്നുമാസം മുന്‍പ് മുന്‍കൂര്‍ നോട്ടിസ് നല്‍കണമെന്ന കാലപരിധി പാലിക്കാത്തതിനാല്‍ സ്വയംവിരമിക്കല്‍ അപേക്ഷ അനുവദിക്കാനാവില്ലെന്ന് ചൂണ്ടിക്കാട്ടി കേന്ദ്രം മടക്കി അയച്ചിരുന്നു. കഴിഞ്ഞ രണ്ടുവര്‍ഷമായി ജേക്കബ് തോമസ് സസ്‌പെന്‍ഷനിലാണ്.

ഓഖി ദുരന്തവുമായി ബന്ധപ്പെട്ട് സര്‍ക്കാരിനെ വിമര്‍ശിച്ചതിനാണ് ആദ്യം സസ്‌പെന്‍ഡ് ചെയ്തത്. തുടര്‍ന്ന് അനുമതിയില്ലാതെ പുസ്തകമെഴുതി, ഡ്രഡ്ജര്‍ അഴിമതി തുടങ്ങിയവ ചൂണ്ടിക്കാട്ടി സസ്‌പെന്‍ഷന്‍ കാലാവധി ദീര്‍ഘിപ്പിക്കുകയായിരുന്നു.