കൊയിലാണ്ടി: പ്രതിമ നിര്‍മിച്ച് വില്‍പന നടത്തുന്ന ഇതര സംസ്ഥാന തൊഴിലാളികള്‍ക്കു നേരെ അക്രമം. ഇന്നലെ വൈകിട്ട് പൂക്കാട് ടൗണിനു സമീപമാണ് സംഭവം. കാറിലെത്തിയ ആറംഗ സംഘമാണു സ്ത്രീകളും കുട്ടികളുമടങ്ങിയ പ്രതിമ വി ല്‍പനയ്ക്കാരായ നാടോടികളെ മര്‍ദിച്ചത്.
രാജസ്ഥാന്‍ സ്വദേശികളായ ബാബുരാജ് (50), ധനി (45), ഇന്ദര്‍ (9),ശിവലാല്‍ (45), കൈലാസ് (17) എന്നിവര്‍ക്കാണു മര്‍ദനമേറ്റത്.
ഇന്ദര്‍ വെങ്ങളം വികാസ് നഗര്‍ യു.പി സ്‌കൂളിലെയും കൈലാസ് പാവങ്ങാട് മലബാര്‍ കോളജിലെയും വിദ്യാര്‍ഥികളാണ്. പന്തീരാങ്കാവ് സ്വദേശികളായ കൊളാട്ട് മീത്തല്‍ സുബീഷ് (29), തിരുമംങ്കലത്ത് സന്‍ജിത്ത് (33), എടക്കോത്ത് ഷിബിന്‍ ലാല്‍ (25), എടക്കോത്ത് അര്‍ജുന്‍ (25), പൂത്തുര്‍ തെക്കയില്‍ വിഷ്ണു (30), കൈക്കോട്ട്കാവ് പ്രസാദത്തില്‍ പ്രവീണ്‍ (25) എന്നിവര്‍ക്കെതിരേ സംഭവത്തില്‍ കൊയിലാണ്ടി പൊലിസ് കേസെടുത്തു.
പരുക്കേറ്റവരെ താലൂക്ക് ആശുപത്രിയില്‍ പ്രവേശിപ്പിച്ചു. പ്രതിമയുടെ വിലയെ ചൊല്ലിയുള്ള തര്‍ക്കമാണ് അക്രമത്തില്‍ കലാശിച്ചതെന്ന് അറിയുന്നു.
50,000 രൂപ നഷ്ടമുണ്ടായതായി അക്രമത്തിനിരയായവര്‍ പറഞ്ഞു.