നാദാപുരം: കഴിഞ്ഞദിവസം പെയ്ത ശക്തമായ മഴയില്‍ വെള്ളം കയറിയ നാദാപുരം ടൗണിലെ കടകളില്‍ പരിശോധന നടത്തി.
ഓവുചാലുകളില്‍ നിന്ന് മലിനജലം കടകള്‍ക്കുള്ളിലേക്ക് കയറി നഷ്ടം സംഭവിച്ച സംഭവത്തില്‍ വ്യാപാരികള്‍ പഞ്ചായത്തിന് നല്‍കിയ പരാതിയുടെ അടിസ്ഥാനത്തിലാണ് പൊതുമരാമത്ത് ഓവര്‍സിയര്‍ വിനോദ്, ജല അതോറിറ്റി എന്‍ജിനീയര്‍ ജ്യോ ദിവാസ് എന്നിവരടങ്ങിയ സംഘം പരിശോധന നടത്തിയത്. മലിനജലം ഒഴികിപ്പോകാന്‍ ആവശ്യമായ സംവിധാനം ഏര്‍പ്പെടുത്തുമെന്ന് പരിശോധന നടത്തിയ സംഘം അറിയിച്ചു.
പഞ്ചായത്ത് പ്രസിഡന്റ് എം.കെ സഫീറ, പഞ്ചായത് സാനിറ്ററി ഇന്‍സ്‌പെക്ടര്‍ സതീഷ് ബാബു, വ്യാപാരി വ്യവസായി ഏകോപന സമിതി ജില്ലാ സെക്രട്ടറി ഏരത്ത് ഇഖ്ബാല്‍, മണ്ഡലം സെക്രട്ടറി അബ്ബാസ് കണേക്കല്‍, ഹാരിസ് മാതോട്ടത്തില്‍, ജാഫര്‍ വയങ്ങോട്ട് എന്നിവരും പരിശോധനാ സംഘത്തോടൊപ്പമുണ്ടായിരുന്നു.