തൊടുപുഴ:  കോലാനി ഗവണ്‍മെന്റ് എല്‍പി സ്‌കൂളില്‍ സാമൂഹ്യവിരുദ്ധരുടെ അതിക്രമം. സ്‌കൂളിന്റെ വാതില്‍ ഇടിച്ചുതകര്‍ത്ത സാമൂഹ്യവിരുദ്ധര്‍ മലമൂത്രവിസര്‍ജ്ജനം നടത്തുകയും ബാത്‌റൂമിന്റെ ഭിത്തിയില്‍ അശ്ലീലചിത്രങ്ങള്‍ വരയ്ക്കുകയും ചെയ്തു.
വ്യാഴാഴ്ച രാത്രിയാണ് സംഭവമെന്ന് കരുതുന്നു. ഇന്നലെ രാവിലെ സ്‌കൂള്‍ അധികൃതര്‍ എത്തിയപ്പോഴാണ് എല്ലായിടവും അലങ്കോലമായി കിടക്കുന്നത് കണ്ടത്. സ്‌കൂളിനുള്ളില്‍ കടന്നിരുന്ന് മദ്യപിച്ചതായും സംശയിക്കുന്നു.
കംപ്യൂട്ടര്‍ റൂമിന്റെയും ഓഫീസിന്റെയും പൂട്ടുകള്‍ തല്ലിത്തകര്‍ക്കാനും ശ്രമിച്ചിട്ടുണ്ട്. ബാത്‌റൂമിന്റെ പൂട്ട് പൊളിച്ച് ഉള്ളില്‍ കടന്നാണ് ഭിത്തിയില്‍ അശ്ലീലചിത്രങ്ങള്‍ വരച്ചത്.
സ്‌കൂള്‍ അധികൃതര്‍ പൊലിസില്‍ വിവരം അറിയിച്ചതിനെ തുടര്‍ന്ന് സ്ഥലത്ത് പരിശോധന നടത്തി. ബാത്‌റൂമിന്റെ ഭിത്തിയില്‍ ഒരു മൊബൈല്‍ഫോണ്‍നമ്പരും എഴുതിയിട്ടിരുന്നു.
സംഭവവുമായി ബന്ധപ്പെട്ട് ഒരാളെ നിരീക്ഷിച്ചു വരികയാണെന്ന് തൊടുപുഴ എസ്‌ഐ ജോബിന്‍ ആന്റണി അറിയിച്ചു. സാമൂഹ്യവിരുദ്ധരുടെ അതിക്രമത്തില്‍ കൗണ്‍സിലര്‍ ആര്‍. ഹരിയും പിടിഎ പ്രസിഡന്റ് എം ഉണ്ണിക്കൃഷ്ണനും പ്രതിഷേധിച്ചു.
കുറ്റക്കാര്‍ക്കെതിരെ ശക്തമായ നടപടി സ്വീകരിക്കണമെന്നും അവര്‍ ആവശ്യപ്പെട്ടു.