കിങ്സ്റ്റണ്‍: രണ്ടാം ടെസ്റ്റിലെ ജയത്തോടെ മറ്റൊരു തകര്‍പ്പന്‍ റെക്കോര്‍ഡിനുടമയായി ഇന്ത്യന്‍ നായകന്‍ വിരാട് കോഹ്‌ലി. ഇന്ത്യയെ ഏറ്റവുമധികം ടെസ്റ്റുകളില്‍ വിജയിപ്പിച്ച ക്യാപ്റ്റനെന്ന നേട്ടമാണ് കോഹ്‌ലി കൂട്ടിച്ചേര്‍ത്തത്. ഇക്കാര്യത്തില്‍ എം.എസ് ധോണിയെയാണ് മറികടന്നത്.
60 മത്സരങ്ങളില്‍ നിന്ന് 27 വിജയങ്ങള്‍ അക്കൗണ്ടിലുണ്ടായിരുന്ന ധോണിയുടെ നേട്ടമാണ് പിന്നിലാക്കിയത്. വിന്‍ഡീസിനെതിരേ ജയിച്ചതോടെ കോഹ്‌ലിയുടെ പേരില്‍ 28 ജയമായി. ഈ നേട്ടം കൈവരിച്ചതാവട്ടെ 48 മത്സരങ്ങളില്‍ നിന്ന്. 49 മത്സരങ്ങളില്‍ നിന്ന് 21 വിജയങ്ങള്‍ സ്വന്തമാക്കിയ സൗരവ് ഗാംഗുലിയാണ് മൂന്നാം സ്ഥാനത്ത്.
വിദേശത്തെ ഇന്ത്യന്‍ ക്യാപ്റ്റന്‍മാരുടെ ജയത്തില്‍ നേരത്തേ കോഹ്‌ലി ഗാംഗുലിയെ പിന്നിലാക്കിയിരുന്നു. 11 വിദേശ ജയങ്ങളാണ് ഗാംഗുലിയുടെ പേരിലുണ്ടായിരുന്നത്. 28 എവേ ടെസ്റ്റില്‍ നിന്നായിരുന്നു ഇത്. 27 എവേ ടെസ്റ്റില്‍നിന്ന് കോഹ്‌ലിയുടെ പേരില്‍ 13 വിജയങ്ങളുണ്ട്.