വടകര: യുവമോര്‍ച്ച വടകര മണ്ഡലം സെക്രട്ടറിയും അറക്കിലാട് സ്വദേശിയുമായ വി.കെ നിധിന്റെ വീടിനു നേരെ ബോംബെറിഞ്ഞ കേസില്‍ രണ്ടു സി.പി.എം പ്രവര്‍ത്തകര്‍ കോടതിയില്‍ കീഴടങ്ങി. പുത്തൂര്‍ അറക്കിലാട് സ്വദേശി പത്മാലയത്തില്‍ ശരത്‌ലാല്‍, വടക്കേ പുറത്തൂട്ട് നിധീഷ് എന്നിവരാണു വടകര ജുഡിഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് കോടതിയില്‍ കീഴടങ്ങിയത്. പ്രതികളെ കോടതി 14 ദിവസത്തേക്ക് റിമാന്‍ഡ് ചെയ്തു.
ഇക്കഴിഞ്ഞ മൂന്നിന് പുലര്‍ച്ചെയാണു ബോംബേറുണ്ടായത്. അക്രമത്തില്‍ വീടിന്റെ മുന്‍ഭാഗത്തെ ജനല്‍ചില്ലുകള്‍ തകരുകയും ചുമരിനു വിള്ളല്‍ സംഭവിക്കുകയും ചെയ്തിരുന്നു. വടകരയിലെ സി.പി.എം-ബി.ജെ.പി സംഘര്‍ഷത്തിന്റെ തുടക്കമായ അക്രമമായിരുന്നു ഇത്. വടകരയില്‍ കഴിഞ്ഞ ദിവസങ്ങളിലുണ്ടായ അക്രമങ്ങളില്‍ ഒരു കേസില്‍ പോലും പ്രതികളെ ഇതുവരെ അറസ്റ്റ് ചെയ്യാന്‍ പൊലിസിനു കഴിഞ്ഞിട്ടില്ല.